रामेछाप । नेकपा एमाले रामेछाप नवौँ जिल्ला अधिवेशनको तयारीमा जुटेको छ । नेकपा एमालेको भूगोलका सबै वडा र उत्पीडित समुदायबाट प्रतिनिधि छनोट वैशाख १५ गते हुने छ । गत चैत २२ गते सम्पन्न भएको एमाले रामेछापको १० औँ पूर्ण बैठकले जिल्ला अधिवेशनको मिति तय गरेको थियो ।
पार्टीको अधिवेशन नजिकिए सँगै एमालेको वडा कमिटीदेखि जिल्ला कमिटी तथा सबै जनवर्गिय सङ्गठनहरू पनि आ आफ्नो तयारीमा जुटेका छन् । बैठकको निर्णय अनुसार जनसङ्गठनका प्रतिनिधि छनोट कार्य वैशाख १७ गते जिल्ला सदरमुकाम मन्थलीमा हुने छ । जिल्ला अधिवेशन उद्घाटन वैशाख २६ गते मन्थली स्थित तीनलाल पार्कमा हुने एमाले रामेछापले जनाएको छ । अधिवेशनको उद्घाटन पार्टी केन्द्रीय अध्यक्ष केपी शर्मा ओलीले गर्ने कार्यक्रम रहेको एमाले रामेछापका अध्यक्ष आनन्दकुमार श्रेष्ठले जानकारी दिए ।
जिल्ला अधिवेशन सम्पन्न गर्न पार्टी जिल्ला कमिटी अध्यक्ष आनन्द श्रेष्ठको संयोजकत्वमा जिल्ला कमिटीका पदाधिकारी, सदस्यहरू र पालिका कमिटीका अध्यक्षहरू रहेको १५२ सदस्यीय ९ औँ जिल्ला अधिवेशन मूल व्यवस्थापन समिति गठन गरिएको छ । मूल व्यवस्थापन समितिको कामलाई थप व्यवस्थित गर्न विभिन्न उपसमिति गठन गरिएको छ । पार्टी अध्यक्ष आनन्द श्रेष्ठको संयोजकत्वमा साङ्गठनिक, राजनैतिक प्रतिवेदन, प्रस्ताव मस्यौदा उपसमिति बनेको छ । त्यस्तै उपाध्यक्ष इन्द्रबहादुर तामाङको संयोजकत्वमा अतिथि सत्कार उपसमिति बनाइएको छ । प्रतिनिधि व्यवस्थापन उपसमितिको संयोजन गर्ने जिम्मेवारी पार्टी सचिव पुरुषोत्तम कडरियालाई दिइएको छ । प्रचार प्रसार उपसमितिको संयोजकको जिम्मेवारी उपसचिव प्रकाशकुमार कार्कीले पाएका छन् । आवास एवम् खाद्य व्यवस्थापन उपसमितिको संयोजक अर्का उपसचिव होतराज ढकाल, आर्थिक प्रतिवेदन मस्यौदा उपसमितिको संयोजन वित्त तथा कोष व्यवस्थापन विभागका प्रमुख रामप्रसाद देवकोटाले पाएका छन् ।
आर्थिक उपसमितिको संयोजक पार्टी अध्यक्ष आनन्द श्रेष्ठ आफैँ रहेका छन् । सदस्यमा जिल्ला कमिटी पदाधिकारीहरू र वित्त तथा कोष व्यवस्थापन विभाग रहेका छन् । मञ्च तथा हल व्यवस्थापन उपसमितिको जिम्मेवारी मिलन घिसिङ संयोजक रहेको उपसमितिले पाएको छ । स्वयंसेवक परिचालन उपसमिति संयोजकको जिम्मेवारी उज्ज्वल सुवेदीलाई दिएको छ । प्रतिनिधि छनौटका लागी वडा निर्वाचन क्षेत्र तोकिएको छ ।
