रामेछाप । मन्थली नगरपालिकामा बाल अधिकार संरक्षण तथा प्रवद्र्धनका उद्देश्यले सक्रिय रहेको नमुना मन्थली नगर बाल सञ्जाल पुनर्गठन गरिएको छ । शनिबार नगरपालिकाको सभाहलमा आयोजित कार्यक्रममार्फत नयाँ कार्यसमिति चयन गरिएको हो ।
पुनर्गठन मार्फत सञ्जालको अध्यक्षमा प्रबिन श्रेष्ठ चयन भएका छन् । उपाध्यक्षमा सिर्जना नेपाली र आदर्श श्रेष्ठ, सचिवमा जेनिसा पाण्डे, सहसचिवमा अरुणा घिमिरे तथा कोषाध्यक्षमा श्रीया कार्की निर्वाचित भएका छन् ।
त्यस्तै समितिका सदस्यहरूमा युनिक भुजेल, मनसुन लामा, समता माझी, युनिक कार्की, ज्ञानिशा अधिकारी, सत्या खड्का र अप्सरा बुढाथोकी चयन भएका छन् । सल्लाहकारमा रुबिन बोहरा, अपेना कार्की र सीता कार्की मनोनयन गरिएको छ ।
निवर्तमान अध्यक्ष रुबिन बोहराको अध्यक्षतामा सम्पन्न कार्यक्रममा नगरप्रमुख लब श्रेष्ठ, प्रमुख प्रशासकीय अधिकृत श्री देवर्षि सापकोटा, नगरप्रबक्ता गोपाल श्रेष्ठ, नेपाल पत्रकार महासंघ रामेछापका कोषाध्यक्ष युवराज श्रेष्ठ, नेपाल बाल संगठनका अध्यक्ष सुन्दर घिमिरे , बाल सञ्जालका संस्थापक अध्यक्ष उत्सव केसीले नयाँ नेतृत्वलाई बधाई दिँदै मन्तव्य व्यक्त गरेका थिए । उनीहरूले बाल अधिकार संरक्षण, बालमैत्री कार्यक्रम सञ्चालन तथा बालमैत्री नगर निर्माणमा नगर बाल सञ्जालले खेलेको भूमिकाको प्रशंसा पनि गरे।
कार्यक्रमका वक्ताहरूले पुनर्गठित समितिले बाल सहभागिता, संरक्षण, विकास र सुरक्षा सुनिश्चित गर्न अझ प्रभावकारी कार्यक्रम सञ्चालन गर्ने अपेक्षा व्यक्त गरेका छन्। नगर बाल सञ्जाल मन्थलीले समुदाय, विद्यालय र स्थानीय निकायसँग समन्वय गर्दै बालमैत्री कार्यक्रम तथा पूर्वाधार निर्माणमा निरन्तर सक्रिय भूमिका खेल्दै आएको छ।
