मन्थली
कात्तिक १५- जिल्लाको पुरानो सहकारी संस्था मन्थली बचत तथा ऋण सहकारी संस्थाले आफ्नो २८ औँ वार्षिक सभा सम्पन्न गरेको छ । शनिवार मन्थली स्थित तीनलाल पार्कमा भएको साधारण सभाले अध्यक्ष गोविन्द घिमिरेद्वारा प्रस्तुत संस्थागत प्रतिवेदन, सचिव हिमाल ढुङगेलद्धारा प्रस्तुत साङ्गठनिक प्रतिवेदन र कोषाध्यक्षको प्रतिवेदन सर्व सम्मत रुपमा पारित गरेको छ ।
समाजसेवी स्वर्गीय जगदीश घिमिरेको अगुवाईमा ११ जना संस्थापकतर्फबाट आरम्भ भएको उक्त सहकारीले २८ वर्षमा आइपुग्दा १ अर्ब ३२ करोड ४२ लाख, ४५ हजार ९ सय रुपैयाँ बराबरको सम्पति आर्जन गर्न सफल भएको अध्यक्षको प्रतिवदेनमा उल्लेख गरिएको छ । संस्थाले गत एक वर्षको अवधिमा कुल १ करोड ५७ लाख रुपैयाँ मुनाफा कमाउन सफल भएको छ ।
जिल्ला सहकारी सँघका उपाध्यक्ष श्याम थापाको आथित्यतामा भएको साधारण सभामा वक्ताहरूले आम शेयर सदस्यहरूले संस्था र त्यसका सञ्चालकहरूको व्यवहारमा निगरानी गर्न सुझाएका थिए । सो अवसरमा उनीहरूले पछिल्लो समयमा कतिपय सहकारी संस्थाहरू सञ्चालकहरूको गतिविधिका कारण बदनाम भएका र उनीहरूका कारण अन्य संस्थाहरू प्रति पनि सर्व साधारणले हेर्ने दृष्टिकोण खराब बन्दै गएकोले यसका सञ्चालकहरूलाई पनि गम्भिर भएर काम गर्नका लागि आग्रह गरेका थिए ।
सो क्रममा अतिथि वक्ताहरूले सहकारीले नीति र विधिका आधारमा लगानीका आधारमा आफनो खराब ऋणीको सूचीमा परेकाहरुबाट संस्थालाई जोगाएर अघि बढ्नु संस्थाका लागि चुनौति रहेको भन्दै त्यसका लागि नयाँ सञ्चालक समितिले आत्मविश्वासका साथ काम गर्नु पनि धारणा राखेका थिए ।साधारण सभाले निवर्तमान अध्यक्ष गोविन्द घिमिरेको अध्यक्षतामा आगामी ४ वर्षका लागि नयाँ सञ्चालक समितिको समेत गठन गरेको छ । नव निर्वाचित हुनेहरूमा उपाध्यक्ष चन्दा खड्का, सचिवमा हिमाल ढुङ्गेल, कोषाध्यक्षमा महेश घिमिरे र लेखा तथा सुपरीवेक्षण समितिको संयोजकमा नवीन घिमिरेलाई सर्व सम्मत रुपमा पारित गरेको छ । संस्थाले आफ्नो साधारण सभा सहकारी मन्त्रालयबाट प्राप्त मापदण्ड भित्र रहेर साधारण तरिकाले सम्पन्न गरेको नव निर्वाचित सचिव हिमाल ढुङ्गेलले जानकारी गराए ।
