रामेछाप । मन्थली नगरपालिकामा आयोजना भएको ‘नगर स्तरीय राष्ट्रपति रनिङ शिल्ड प्रतियोगिता’मा मन्थली माध्यमिक विद्यालय (मन्थली मावि) ले फेरि आफ्नै प्रभुत्व कायम राख्दै लगातार ८ औँ पटक उपाधि जितेको छ । कुल १९ वटा सार्वजनिक तथा संस्थागत विद्यालयलाई पछि पार्दै उसले यो रेकर्ड कायम गरेको हो ।
बिहीबारदेखि मन्थली माविको खेलमैदानमा चलेको विभिन्न खेलप्रतिस्पर्धामा विद्यालयले ३४ स्वर्णसहित कुल ८० पदक हात पार्दै नयाँ इतिहास रच्यो। लगातार दोस्रो बन्ने क्रम तोड्न नसकेको तामाकोशी बोर्डिङ स्कूल यसपटक पनि उपविजेतामै सीमित रह्यो।
१४ वटा वडाका २० विद्यालयका विद्यार्थीहरूले ६६ स्वर्णका लागि प्रतिस्पर्धा गरेको प्रतियोगितामा मन्थली माविले पुनः आफ्नो बलियो उपस्थिति देखायो। दुई रनिङ शिल्ड पञ्च गरिसकेको विद्यालयले अर्को वर्ष तेस्रो शिल्ड पनि पञ्च गर्ने दाबी प्रअ टंकप्रसाद दाहालले गरे।
निजी क्षेत्रको तामाकोशी बोर्डिङ स्कूल लगातार चौथो वर्ष दोस्रो बन्न पुग्यो। ‘फस्ट हुने लक्ष्य हुन्छ, तर अहिलेसम्म पूरा हुन सकेको छैन, आगामी वर्ष हेरौँ,’ प्रअ दीपक खड्काले प्रतिक्रिया दिए।
प्रतियोगिताका विजेताहरूलाई मन्थली नगरपालिकाका प्रमुख लव श्रेष्ठ, विद्यालय व्यवस्थापन समितिका अध्यक्ष कुमार श्रेष्ठलगायतले शिल्ड, पदक र प्रमाणपत्रसहित नगद पुरस्कार प्रदान गरे।
विजेता मन्थली माविले ४० हजार रुपैयाँसहित ट्रफि, शिल्ड र प्रमाणपत्र प्राप्त ग¥यो । ११ स्वर्ण, १४ रजत र १६ कास्य गरी ४१ पदक जितेको तामाकोशी बोर्डिङले २५ हजारसहित पुरस्कार पायो ।
तेस्रो कर्कला देवी बोर्डिङ स्कूल (केब्स) ले ७ स्वर्ण, ३ रजत र ६ कास्य गरी १६ पदक जित्दै १५ हजार प्राप्त ग¥यो । बाहिरी क्षेत्रबाट प्रतियोगितामा सहभागी निलकण्ठेश्वर मावि कठजोरले ५ हजार रुपैयाँसहित सान्त्वना पुरस्कारमा चित्त बुझायो।
२११ पदक (६६ स्वर्ण, ६६ रजत, ७९ कास्य) का लागि भएको प्रतिस्पर्धामा चार विद्यालयले भने एक पदक पनि जित्न सकेनन्। मन्थली नगरपालिका–१४ का कालीदेवी मावि र बौद्ध मावि, वडा १२ को शारदा मावि र वडा १० को सरस्वती माविले शून्य पदकमा सीमित भए ।
