रूपन्देही । लुम्बिनी प्रदेशको मुख्यमन्त्री शंकर पोखरेल नभएको भन्दै नेकपा माओवादी केन्द्र लुम्बिनी प्रदेश संसदीय दलका नेता कुलप्रसाद केसीले बहुमतको मुख्यमन्त्री आफू नै भएको दाबी गरेका छन् । नेकपाका एमालेका संसदीय दलका नेता शंकर पोखरेललाई प्रदेश प्रमुख धर्मनाथ यादवले शपथ खुवाएपनी प्रदेश प्रमुखले असंवैधानिक काम गरेको नेता केसीको भनाई छ ।
गठबन्धन दल माओवादी, कांग्रेस, जसपा र राष्ट्रिय जनमोर्चाको गठबन्धनबाट ४२ सांसदको बहुमत आफु संग भएको भन्दै केसीले मुख्यमन्त्री घोषणा गरेका हुन् । उनी चार दलको प्रस्तावित मुख्यमन्त्री रहेका छन् । प्रदेश प्रमुख कार्यालय अगाडि धर्नामा बसेका गठबन्धनका तर्फबाट बोल्दै प्रदेश प्रमुखले असंवैधानिक काम गरेको नेता केसीको टिप्पणी गरे । ३७ जना सांसद रहेको एमालेका शंकर पोखरेललाई मुख्यमन्त्री नियुक्ति गरेर शपथ ग्रहण गराएर दुर्घना निम्त्याइएको छ’, केसीले भने ।
उनले मुख्यमन्त्री आफू नै भएको बताउँदै कर्मचारीलाई पनि त्यही अनुसार काम गर्न निर्देशन दिएका छन् । नेपाली कांग्रेस संसदीय दलका नेता वीरेन्द्र कनौडियाले पनि अल्पमतको मुख्यमन्त्रीलाई शपथ नखुवाउन प्रदेश प्रमुखलाई आग्रह गरेका थिए ।
प्रदेश प्रमुख धर्मनाथ यादवले संविधानको धारा १६८ को १ अनुसार बहुमत दलका रुपमा एमालेका तर्फबाट मुख्यमन्त्रीमा शंकर पोखरेललाई नियुक्त गरेका थिए । यो लगत्तै प्रदेश कार्यालय घेराउ गर्दै तीन दलले शपथ रोक्न माग गरेपनि मुख्यमन्त्री पोखरेलले कडा सुरक्षा घेरामा शपथ लिइसकेका छन् ।