लिखु तामाकोशी गाउँपालिकामा दुग्ध व्यवसायी तथा कृषकहरूका लागि सात दिने ‘डेरी उद्यमी तालिम’ बिहीबारदेखि सुरु भएको छ। गाउँपालिकाको चालु आर्थिक वर्षको प्रदेश ससर्त कार्यक्रम अन्तर्गत ‘दुध तथा दुग्धजन्य पदार्थको मूल्य श्रृङ्खला विकास कार्यक्रम’ मार्फत पशुपन्छी विकास शाखाले उक्त तालिमको आयोजना गरेको हो। तालिमको उद्घाटन गाउँपालिकाका अध्यक्ष केशव महतले गर्नुभएको छ। उद्घाटन समारोह गाउँपालिकाका अध्यक्ष महतको अध्यक्षता तथा उपाध्यक्ष दिपा पाख्रिनको विशिष्ट आतिथ्यतामा सम्पन्न भएको थियो। कार्यक्रममा बोल्नुहुँदै अध्यक्ष महतले स्थानीय स्तरमा दुग्ध व्यवसायको प्रवर्द्धन गर्न, उत्पादित दूधको सही मूल्य शृङ्खला विकास गर्न र कृषकहरूलाई व्यावसायिक रूपमा आत्मनिर्भर बनाउन यस तालिमले कोसेढुङ्गाको काम गर्ने विश्वास व्यक्त गर्नुभयो।
२० गतेसम्म सञ्चालन हुने यो तालिममा वडा नम्बर १ देखि ७ सम्मका प्रत्येक वडाबाट २ जनाका दरले व्यावसायिक रूपमा दूध उत्पादन तथा बिक्री वितरणमा संलग्न वास्तविक कृषकहरूलाई विशेष प्राथमिकता दिँदै तालिममा सहभागी गराइएको छ।
तालिम अवधिभर भक्तपुरको चाँगुनारायण नगरपालिकाका वरिष्ठ पशु विकास अधिकृत खड्क कुमार मैनालीले मुख्य प्रशिक्षकको रूपमा सहजीकरण गरिरहनुभएको छ। तालिममा दूधबाट आधुनिक तथा वैज्ञानिक तरिकाले विभिन्न दुग्धजन्य पदार्थहरू उत्पादन गर्ने प्रविधि र बजार व्यवस्थापनबारे गहन व्यावहारिक ज्ञान प्रदान गरिने छ।
