लिखु तामाकोशीमा डेरी उद्योग सञ्चालन सम्बन्धी तालिम सञ्चालन हुने लिखु तामाकोशी गाउँपालिकामा दुग्ध व्यवसायी तथा कृषकहरूका लागि सात दिने डेरी उद्योग सञ्चालन सम्बन्धी तालिम सञ्चालन हुने भएको छ । गाउँपालिकाको चालु आर्थिक वर्ष २०८२/८३ को प्रदेश ससर्त कार्यक्रम अन्तर्गत दुध तथा दुग्धजन्य पदार्थको मूल्य श्रृङ्खला विकास कार्यक्रम मार्फत पशुपुन्छी विकास शाखाले उक्त तालिम आयोजना गर्न लागेको हो ।जेठ १४ देखि सुरु भई २० गतेसम्म सञ्चालन हुने उक्त सात दिने तालिममा सहभागी छनौट गरि पठाइदिन गाउँपालिका कार्यालयले वडा नम्बर १ देखि ७ सम्मका वडा कार्यालयलाई पत्राचार समेत गरिसकेको छ ।गाउँपालिकाद्वारा जारी सूचना अनुसार प्रत्येक वडाबाट २ जनाका दरले दुध उत्पादक कृषकहरूलाई सहभागीका रूपमा छनौट गरि पठाउन अनुरोध गरिएको छ । कृषक छनौट गर्दा दुध तथा दुग्धजन्य पदार्थको मूल्य श्रृङ्खला विकास कार्यक्रममा पूर्व आवेदन पेश गरिसकेका तथा व्यावसायिक रूपमा दुध उत्पादन गरि बिक्री वितरणमा संलग्न रहेका वास्तविक कृषकहरूलाई विशेष प्राथमिकता दिनुपर्ने कार्यालयले स्पष्ट पारेको छ ।यसका साथै तालिम अवधिभर सम्बन्धित वडाका पशु सेवा प्राविधिकहरूलाई समेत अनिवार्य उपस्थित गराउन अनुरोध गरिएको छ ।तालिम लिखु तामाकोशी गाउँपालिकाको धोबी बजारमा आयोजना हुनेछ । दैनिक रूपमा बिहान १० देखि बेलुका ५ बजेसम्म सञ्चालन हुने सो तालिमबाट स्थानीय स्तरमा दुग्ध व्यवसायको प्रवर्द्धन र कृषकहरूको कार्यक्षमतामा वृद्धि हुने विश्वास पशुपन्छी विकास शाखा प्रमुख लोकप्रसाद फुँयालले व्यक्त गर्नु भयो ।
