रामेछाप । आगामी प्रतिनिधिसभा निर्वाचनमा नेपाली कांग्रेसका उम्मेदवार रामचन्द्र खड्कालाई विजयी गराउने उद्देश्यसहित रामेछापमा युवा शक्ति परिचालनलाई केन्द्रमा राख्दै विशेष चुनावी अभियान सुरु गरिएको छ। कांग्रेस जिल्ला कार्यसमिति रामेछापले १८ देखि ३० वर्ष उमेर समूहका युवा तथा Gen-Z मतदातालाई लक्षित गर्दै सञ्चालन गरिने विशेष अभियानको संयोजकको जिम्मेवारी विद्यार्थी नेता सञ्जय बुढाथोकीलाई प्रदान गरेको हो।
जिल्ला कार्यसमितिद्वारा जारी पत्रअनुसार फागुन २१ गते हुने प्रतिनिधिसभा निर्वाचनलाई लक्षित गर्दै युवामार्फत चुनावी माहोल निर्माण गर्ने, मतदातासँग प्रत्यक्ष संवाद गर्ने तथा पार्टीका नीति, कार्यक्रम र उम्मेदवार खड्काको राजनीतिक दृष्टिकोण जनस्तरसम्म पुर्याउने अभियान सञ्चालन गरिनेछ।
स्ववियू परिषद्का पूर्व सभापतिसमेत रहेका बुढाथोकीलाई युवा पुस्तासँगको पहुँच, संगठनात्मक क्षमता र सक्रिय भूमिकालाई मध्यनजर गर्दै अभियानको नेतृत्व सुम्पिएको कांग्रेसको भनाइ छ। अभियानका क्रममा जिल्लाभित्र रहेका पार्टी संरचना, भातृ तथा शुभेच्छुक संस्थाहरूसँग समन्वय गर्दै युवालाई केन्द्रमा राखेर चुनावी गतिविधि अघि बढाइनेछ।
कांग्रेस जिल्ला कार्यसमिति रामेछापका सभापति तथा जिल्ला निर्वाचन परिचालन समितिका संयोजक पूर्णबहादुर तामाङ (कान्छाराम)को नेतृत्वमा जारी पत्रमा निर्वाचन अवधिभर प्राप्त जिम्मेवारीलाई कर्तव्यनिष्ठ रूपमा निर्वाह गर्न आग्रह गरिएको छ। साथै अभियान सफल बनाउन आवश्यक सहयोगका लागि जिल्ला निर्वाचन परिचालन समितिका सदस्यहरू परिचालन गरिने उल्लेख गरिएको छ।
पार्टीले युवा मतदाताको सक्रिय सहभागितामार्फत रामेछापमा कांग्रेसको पक्षमा सकारात्मक वातावरण निर्माण हुने विश्वास व्यक्त गरेको छ। खड्काको विजय सुनिश्चित गर्न सबै तहका नेता–कार्यकर्ता, भातृ संगठन र शुभेच्छुकहरूलाई एकताबद्ध भएर अभियानमा लाग्न कांग्रेसले आह्वान गरेको छ।
