रामेछाप । पश्चिम रामेछापलाई बिपी राजमार्गसँग प्रत्यक्ष रूपमा जोड्ने खैरेनीघाट–दुम्जा सडक खण्डमा बेलिब्रिज जडानको तयारी तीव्र बनेको छ । गएको वर्ष असोज दोस्रो सातामा सुनकोशी नदीमा आएको भीषण बाढीले यहाँको पक्की पुल पूर्ण रूपमा बगाएपछि लामो समयदेखि अवरुद्ध रहेको यातायात मार्ग पुनः सञ्चालन हुने आशा पुनः जागिएको हो ।
पुल बगाएपछि विशेष गरी सुनापति, दोरम्बा शैलुङ र खाँडादेवी गाउँपालिकाका बासिन्दाले काठमाडौँ आवत–जावत, दैनिक सेवा–सुविधा, आपत्कालीन यात्रा र बजार आपूर्तिमा ठूलो कठिनाइ व्यहोर्दै आएका थिए । अब बेलिब्रिज जडानका लागि आवश्यक पार्टसहरू निर्माण स्थलमै आइपुग्न थालेपछि स्थानीयमा उत्साह जागेको छ ।
खाँडादेवी गाउँपालिका–१ राकाथुमका वडा अध्यक्ष रामकुमार श्रेष्ठका अनुसार हालसम्म हेटौँडाबाट ४ भन्दा बढी गाडीमार्फत बेलिब्रिजका पार्टस ल्याइएका छन् । “बेलिब्रिज जडानका सामानहरू लगातार आइरहेका छन्, यो पश्चिम रामेछापका बासिन्दाका लागि खुसीको खबर हो,” उनले भने । उनका अनुसार सामाग्री भित्रिएसँगै अन्य पूर्वाधार तयारी पनि अघि बढिरहेको छ ।
यो पुल जडान भएपछि खाँडादेवी–१ राकाथुम र सिन्धुलीको सुनकोशी गाउँपालिका–१ प्रत्यक्ष रूपमा जोडिनेछ । साथै पश्चिम रामेछापका बासिन्दाले बिपी राजमार्गमार्फत काठमाडौँ तथा काभ्रे क्षेत्रमा सहज रूपमा आवत–जावत गर्न सक्ने हुँदा व्यापार, सेवा प्रवाह र यातायात व्यवस्थामा उल्लेखनीय सहजता आउने अपेक्षा गरिएको वडा अध्यक्ष श्रेष्ठले बताए ।
सडक डिभिजन कार्यालय खुर्कोटका प्रमुख पारसमणि हमालका अनुसार ६८ मिटर लम्बाइको खैरेनीघाट–दुम्जा पुलका लागि आवश्यक सबै पार्टस स्थलमा ल्याउने काम जारी छ । “अहिले बेलिब्रिजका सामानहरू ल्याइने प्रक्रिया चलिरहेको छ । जडान गर्नु भने अझै सुरु भएको छैन,” उनले बताए । उनका अनुसार अबको एक साताभित्र बेलिब्रिज जडान कार्य औपचारिक रूपमा प्रारम्भ हुने छ ।
प्रमुख हमालले आवश्यक सबै पार्टस पुगेपछि जडान कार्य सुरु भई २१ दिनभित्र पुल जडान प्रक्रिया पूरा गर्ने लक्ष्य रहेको जानकारी दिए ।