रामेछाप । केब्स स्कुल मन्थलीले स्काउटिङ शिक्षाअन्तर्गत कक्षा ६, ७ र ८ का ७५ जना स्काउट विद्यार्थीलाई जंगल हाइकिङ तथा डे क्याम्प अभ्यासमा सहभागी गराएको छ। विद्यालयको वार्षिक कार्यक्रम अनुसार शनिबार मन्थली बजार नजिकै सुकाजोर खोलाको बगर क्षेत्रमा तीन किलोमिटर दूरीको हाइकिङ गराइएको हो।
विद्यालयका प्रिन्सिपल केशव तिमल्सिनाका अनुसार स्काउटिङ शिक्षा विद्यार्थीको सर्वाङ्गीण विकासका लागि अनिवार्य अभ्यासका रूपमा हरेक वर्ष सञ्चालन हुँदै आएको छ। कार्यक्रममा विद्यार्थीहरूलाई समूहमा विभाजन गरी गन्तव्य स्थानको पूर्व जानकारी नदिई आफैं बाटो पहिचान गर्दै निर्धारित स्थानमा पुग्नुपर्ने व्यवस्था गरिएको थियो।
हाइकिङमा सहभागी ७५ जना विद्यार्थीलाई ९ समूहमा विभाजन गरिएको थियो। डे क्याम्प अवधिमा प्रत्येक समूहले आवश्यक खानेकुरा आफैं व्यवस्थापन गर्ने, पानी बोक्ने, दाउरा संकलन गर्ने र आगो प्रयोग गरेर खाना पकाउने अभ्यास गरेका थिए। कार्यक्रममा जङ्क फुड पूर्ण रूपमा निषेध गरिएको प्रिन्सिपल तिमल्सिनाले जानकारी दिए।
कार्यक्रम अन्तर्गत विद्यार्थीहरूलाई जंगल हाइक, प्राकृतिक सामग्री संकलन, प्राथमिक स्काउट तालिम तथा ब्लाइन्ड वाकजस्ता अभ्यास गराइएको थियो। ब्लाइन्ड वाक अभ्यासमा विद्यार्थीहरूको आँखामा पट्टी बाँधेर जंगल क्षेत्रमा तानिएको डोरी समात्दै सुरक्षित रूपमा बाटो पहिचान गर्न लगाइएको थियो, जसले आपसी विश्वास र समन्वय क्षमताको विकास गरेको विद्यालयले जनाएको छ।
प्रिन्सिपल तिमल्सिनाका अनुसार कार्यक्रमको मुख्य उद्देश्य विद्यार्थीहरूमा नेतृत्व, समन्वय र आत्मनिर्भरता विकास गर्नु, व्यावहारिक जीवन सीप सिकाउनु तथा विपद् वा विषम परिस्थितिमा उपलब्ध स्रोतको प्रयोग गरी बाँच्न सक्ने क्षमता अभिवृद्धि गर्नु हो। भाँडा बिना खाना पकाउने जस्ता जीवनोपयोगी सीपहरू पनि यस अभ्यासमार्फत सिकाइने गरिएको छ।
केब्स स्कुलमा २०७१ सालदेखि औपचारिक रूपमा स्काउटिङ कार्यक्रम सञ्चालन हुँदै आएको छ। हाल विद्यालयमा करिब ११० जना विद्यार्थी स्काउटिङमा आवद्ध छन्। रामेछाप जिल्लामा जुनीयर स्काउट कार्यक्रम सञ्चालन गर्ने एकमात्र विद्यालय केब्स स्कुल रहेको विद्यालय प्रशासनको दाबी छ।
विद्यालयले स्काउटिङमार्फत क्याम्पफायर, डे क्याम्प, सामाजिक सरसफाइ, स्वयंसेवा तथा विभिन्न तालिम कार्यक्रमहरू नियमित रूपमा सञ्चालन गर्दै आएको छ। समाजसेवाको भावना भएका अनुशासित र सक्षम नागरिक उत्पादन गर्ने लक्ष्यसहित स्काउटिङ कार्यक्रमलाई निरन्तरता दिइएको विद्यालयले जनाएको छ।
