रामेछाप — गोकुलगंगा गाउँपालिकाले राजधानीमै सेवा प्रवाह गर्ने उद्देश्यले करिब एक हप्तासम्म काठमाण्डौको जडिबुटीमा विशेष शिविर सञ्चालन गरेको छ। शिविरमार्फत सामाजिक सुरक्षा भत्ता नवीकरणदेखि जन्मदर्ता, विवाहदर्ता, नागरिकता सिफारिसलगायतका सेवाहरू प्रदान गरिएको गाउँपालिकाले जनाएको छ।
गाउँपालिकाका अनुसार, राजधानीमा सञ्चालन गरिएको शिविरबाट गाउँपालिकाभरिका करिब ६ सय नागरिकले विभिन्न सिफारिस तथा प्रमाणपत्र प्राप्त गरेका छन्। गाउँपालिकामा स्थायी घर भए पनि रोजगारी, शिक्षा र अन्य कारणले काठमाण्डौमा बसोबास गर्ने नागरिकलाई सहज होस् भन्ने उद्देश्यले यस्तो कार्यक्रम गरिएको हो।
वडा नं. २ का अध्यक्ष सुन्दर कार्कीले अधिकांश नागरिक काठमाण्डौमै हुने भएकाले उनीहरूलाई गाउँमै झैँ सेवा दिने सोचले शिविर सञ्चालन गरिएको बताए। उनका अनुसार, ‘काठमाण्डौमै बस्नेले गाउँ पुग्नुपर्ने बाध्यता हटाउन यो पहल गरिएको हो।’
त्यस्तै वडा नं. ३ का अध्यक्ष नरबिक्रम कार्कीले पनि राजधानीमा बस्ने गोकुलगंगा वासीलाई सेवा दिनु जरुरी भएको बताए। उनले भने, ‘नागरिकता सिफारिस वा दर्ता प्रमाणपत्रका लागि गाउँसम्म पुग्न समय, खर्च र अन्य झन्झट हुने भएकाले नागरिकलाई समस्या नहोस् भन्ने उद्देश्यले यहाँ सेवा उपलब्ध गराइयो।’
स्थानीय बासिन्दाले गाउँपालिकाको यो कदमलाई स्वागत गरेका छन्। सेवाग्राहीमध्येकी कमला कार्कीले भनिन्, ‘पहिले हरेक पटक गाउँ पुग्नुपर्ने बाध्यता थियो। अब भने काठमाण्डौमै सहजै सेवा पाउन थालेका छौं।’
यसअघि गाउँपालिकाले वडास्तरमै शिविर संचालन गर्ने गरेको भए पनि राजधानीमै यस्तो प्रकारको शिविर पहिलो पटक गरिएको हो। गाउँपालिकाले आगामी दिनमा आवश्यकता अनुसार यस्ता शिविरलाई निरन्तरता दिने तयारी गरेको जनाएको छ।
