मन्थली, गृह मन्त्रालयले गरेको दोस्रो त्रैमासिक कार्यसम्पादन मूल्याङ्कनमा रामेछाप जिल्ला प्रशासन कार्यालयले उत्कृष्ट नतिजा निकालेको छ। कात्तिकदेखि पुससम्मको कार्यसम्पादनका आधारमा मन्त्रालयले सार्वजनिक गरेको वरियतामा रामेछाप देशभरका ७७ जिल्लामध्ये ११ औँ स्थानमा पर्न सफल भएको हो।
प्रमुख जिल्ला अधिकारी श्यामकृष्ण थापाको नेतृत्वमा रहेको रामेछापले २०.२५ पूर्णाङ्कमा १८.७५ अङ्क प्राप्त गरेको छ। मन्त्रालयको नीति योजना अनुगमन तथा मूल्याङ्कन महाशाखाले तोकेका विभिन्न सूचकहरूमा राम्रो अंक बटुल्दै रामेछापले यो सम्मानजनक उपलब्धि हासिल गरेको हो।
मूल्याङ्कनमा १९.५ अङ्कसहित हिमाली जिल्ला मनाङ पहिलो स्थानमा रहँदा संघीय राजधानी काठमाडौँ भने मात्र ३ अङ्क पाउँदै सबैभन्दा पुछारमा देखिएको छ। देशभरका ठूला र सुविधायुक्त जिल्लाहरूलाई पछि पार्दै रामेछाप उत्कृष्ट ११ भित्र अटाउनुलाई जिल्ला प्रशासनको सक्रियता र सुशासनप्रतिको प्रतिबद्धताका रूपमा हेरिएको छ।
