रामेछाप । नेपाली काँग्रेस रामेछापका उम्मेदवार रामचन्द्र खड्काले जिल्लाका विभिन्न वडामा घरदैलो अभियानलाई तीव्र बनाएका छन्। सोमबार खड्काले खाँडादेवी गाउँपालिका वडा नम्बर १ राकाथुमको चामबोट, वडा नम्बर २ मझुवाको निगालपानी, वडा नम्बर ३ भिरपानीको सित्खा तथा सुनापति गाउँपालिका वडा नम्बर ५ खनियापानीमा पुगेर मतदातासँग प्रत्यक्ष भेटघाट गर्दै चुनावी कार्यक्रम सम्पन्न गरेका हुन्।
घरदैलोका क्रममा उम्मेदवार खड्काले विगतमा जनताले भोग्नुपरेको निराशाजनक अवस्थाको अन्त्य अब आवश्यक रहेको उल्लेख गर्दै सुशासन, विकास र जनमुखी राजनीतिका लागि नेपाली काँग्रेसलाई जिताउन आग्रह गरे। उनले विकासका नाममा भएको दुरुपयोग, बढ्दो बेरोजगारी र जनताको आवाज दबाउने प्रवृत्तिका विरुद्ध काँग्रेस स्पष्ट र दृढ रूपमा उभिने दाबी गरे।
शिक्षा, स्वास्थ्य, कृषि, सडक र रोजगारीजस्ता जनजीवनसँग प्रत्यक्ष जोडिएका विषयलाई प्राथमिकतामा राखेर काम गर्ने प्रतिबद्धता जनाउँदै खड्काले अब भाषणमुखी होइन, परिणाम देखिने राजनीतितर्फ जानुपर्ने आवश्यकता औँल्याए।
घरदैलो अभियानका क्रममा स्थानीय नागरिकले उत्साहजनक सहभागिता जनाउँदै परिवर्तनका लागि नेपाली काँग्रेस उपयुक्त विकल्प भएको प्रतिक्रिया दिएका थिए। जनताको विश्वास र समर्थनले आफूलाई विजयी बनाउनेमा ढुक्क रहेको उम्मेदवार खड्काको भनाइ छ।
