रामेछाप — नेपाली काँग्रेस रामेछापले आसन्न प्रतिनिधिसभा सदस्य निर्वाचनलाई लक्षित गर्दै चुनावी अभियानलाई थप सशक्त, व्यवस्थित र परिणाममुखी बनाउन जिल्लाका सबै वडामा ५१ सदस्यीय वडा–स्तरीय निर्वाचन परिचालन समिति गठन गरेको छ। संगठनलाई वडा तहसम्म मजबुत बनाउँदै मतदातासँग प्रत्यक्ष सम्पर्क विस्तार गर्ने उद्देश्यसहित समिति गठन गरिएको पार्टीले जनाएको छ।
पार्टीको निर्णयअनुसार गठन गरिएका यी समितिहरूले वडा तहमा संगठन सुदृढीकरणका साथै घरदैलो अभियान, कोणसभा, मतदाता भेटघाट, जनसंवाद, युवा तथा महिला परिचालनलगायतका गतिविधिलाई तीव्रता दिनेछन्। पार्टीको नीति, कार्यक्रम र उम्मेदवारका एजेण्डालाई जनताको घर–आँगनसम्म पुर्याउने जिम्मेवारी समितिलाई दिइएको छ।
नेपाली काँग्रेस रामेछापका जिल्ला सचिव बिनोद कार्कीका अनुसार अभियानलाई प्रभावकारी बनाउने लक्ष्यका साथ प्रत्येक वडामा संयोजकसहित ५१ सदस्यीय समिति गठन गरिएको हो। समितिमा पार्टीका सक्रिय कार्यकर्ता, भातृ तथा शुभेच्छुक संस्थाका प्रतिनिधि, युवा, महिला तथा अनुभवी नेताहरूलाई समेटिएको उनले जानकारी दिए। “सबै वडामा समान ढंगले अभियान सञ्चालन होस् भन्ने उद्देश्यले समिति गठन गरिएको हो,” उनले भने।
प्रतिनिधिसभा सदस्यका उम्मेदवार **रामचन्द्र खड्का**ले संगठनलाई आधारभूत तहसम्म मजबुत बनाउँदै जनताको घर–घरमा पुग्ने अभियानलाई प्राथमिकतामा राखिएको बताए। उनले विकास, सुशासन र पारदर्शितालाई मुख्य एजेण्डा बनाउँदै मतदातासँग प्रत्यक्ष संवादमार्फत भरोसा जित्ने रणनीति लिइएको उल्लेख गरे। “अबको चुनाव नाराभन्दा पनि विचार र कार्यक्रमको प्रतिस्पर्धा हो। हामी जनताको विश्वास जित्ने गरी मैदानमा उत्रिएका छौँ,” खड्काले भने।
पार्टीले गठन गरिएका समितिहरूलाई तत्काल क्रियाशील भई मतदाता अभिमुखीकरण, चुनावी रणनीति कार्यान्वयन तथा पार्टी सन्देश प्रवाहमा सक्रिय रूपमा जुट्न निर्देशन दिएको छ। जिल्लाभर चुनावी गतिविधिलाई थप तीव्र बनाउने तयारीसँगै नेपाली काँग्रेस रामेछापले चुनावी माहोल क्रमशः तातिँदै गएको जनाएको छ।
