काठमाडौं । नेपाली कांग्रेसभित्र विशेष महाधिवेशन र नेतृत्वसम्बन्धी विवाद चुलिँदै गएको अवस्थामा नेता शेखर कोइराला पक्षको भेला काठमाडौंको बत्तिसपुतलीमा बसेको छ। आज दिउँसो १ बजेका लागि बोलाइएको भेला केहीबेरअघि सुरु भएको हो।
भेलामा नेता शेखर कोइरालासहित कांग्रेसका नेताहरू धनराज गुरुङ, जीवन परियार, बलबहादुर केसी, गोविन्दराज पोखरेल, रामकृष्ण यादव, दीपक गिरी, डिगबहादुर लिम्बु र दिनेश कोइरालालगायतको उपस्थिति रहेको छ।
निर्वाचन आयोगले विशेष महाधिवेशनबाट निर्वाचित कार्यसमितिलाई मान्यता दिएपछि कांग्रेसभित्र विवाद थप चर्किएको छ। आयोगको निर्णयविरुद्ध निवर्तमान सभापति शेरबहादुर देउवा पक्ष सर्वोच्च अदालत पुगेको छ। तर शेखर कोइराला पक्षका नेताहरू भने सो रिट प्रक्रियामा सहभागी नभएका छन्।
भेलामा पछिल्लो राजनीतिक परिस्थिति, पार्टीको भावी रणनीति र आसन्न निर्वाचनमा पार्टीको भूमिकाबारे छलफल भइरहेको बताइएको छ। कांग्रेसभित्रको विवादका कारण चुनावी तयारी प्रभावित नहोस् भन्ने विषयमा पनि कोइराला पक्षका नेताहरूबीच परामर्श भइरहेको स्रोतले जनाएको छ।
पार्टीलाई एकताबद्ध राख्दै निर्वाचनमा सहभागी हुनुपर्ने धारणा कोइराला पक्षभित्र बलियो रूपमा उठिरहेको छ। यस क्रममा कोइराला पक्षका नेताहरूले नेता शेखर कोइरालालाई पार्टी एकता र चुनावी प्रक्रियामा सक्रिय भूमिका खेल्न आग्रह गरिरहेको बुझिएको छ।
