ललितपुर । पुष्पा भुषालले नेपाली कांग्रेस अब पुरानै ढर्रामा नरहेको स्पष्ट पार्दै पार्टी समयअनुसार रूपान्तरण भइसकेको दाबी गरेकी छन् । उनले देशको राजनीतिक नेतृत्व अब नयाँ पुस्ताको काँधमा सरेको उल्लेख गर्दै कांग्रेसको भावी नेतृत्व गगनकुमार थापाले गर्ने ठोकुवा गरिन् ।
नमूना महिला सञ्जालद्वारा गोदावरी नगरपालिकामा आयोजित निर्वाचन लक्षित विशाल महिला भेलालाई सम्बोधन गर्दै उपसभापति भुषालले कांग्रेस विशेष महाधिवेशनपछि वैचारिक, संगठनात्मक र नेतृत्वको हिसाबले नयाँ उचाइमा पुगेको बताइन् । उनका अनुसार पार्टीभित्र देखिएको पुस्तान्तरण, नीतिगत स्पष्टता र जनउत्तरदायी एजेन्डाले कांग्रेसलाई अब निर्णायक शक्तिका रूपमा अघि बढाएको छ ।
“कांग्रेस अब केवल इतिहास बोकेको पार्टी होइन, वर्तमान बुझ्ने र भविष्यको नेतृत्व गर्ने सामर्थ्य राख्ने पार्टी बनेको छ,” भुषालले भनिन्, “देशलाई स्थायित्व, सुशासन र समृद्धिको बाटोमा लैजान सक्ने नेतृत्व गगन थापामा छ ।” उनले कांग्रेसको घोषणापत्रमा राष्ट्र निर्माणको स्पष्ट मार्गचित्र समेटिएको उल्लेख गर्दै एजेन्डाविहीन राजनीति गर्नेहरूलाई जनताले अस्वीकार गर्ने विश्वास व्यक्त गरिन् ।
भुषालले लोकतन्त्र, सामाजिक न्याय र समावेशी विकास कांग्रेसको मूल चिनारी भएको उल्लेख गर्दै यी मूल्यहरूलाई व्यवहारमा उतार्न पार्टी दृढताका साथ अघि बढिरहेको बताइन् । उनले कांग्रेसले लिएको राष्ट्रको मुहार फेर्ने संकल्प अब नारामा सीमित नरही व्यवहारमा देखिन थालेको दाबी गरिन् ।
कार्यक्रममा उनले देशभरका महिलाहरू, विशेष गरी गोदावरी क्षेत्रका महिलाहरूलाई कांग्रेसको अभियानमा सक्रिय भूमिका खेल्न आह्वान गरिन् । “राजनीतिक परिवर्तनको निर्णायक शक्ति महिला हुन्,” उनले भनिन्, “कांग्रेसलाई देशकै सबैभन्दा ठूलो पार्टी बनाउन र चुनावी नतिजा आफ्नो पक्षमा पार्न महिलाको संगठित सहभागिता अपरिहार्य छ ।”
उपसभापति भुषालको भनाइमा बद्लिएको कांग्रेस, स्पष्ट एजेन्डा र नयाँ पुस्ताको नेतृत्वसहित चुनावी मैदानमा उत्रँदैछ । अबको राजनीति पुराना वाचा र आरोप–प्रत्यारोपमा सीमित नरही परिणाममुखी र जनउत्तरदायी हुनुपर्ने उनको जोड थियो ।
