जनकपुरधाम । जनकपुरमा पत्रकारमाथि वकिलले गरेको आक्रमणका दोषीलाई कारबाही गर्न माग गर्दै नेपाल पत्रकार महासंघ मधेश प्रदेश समितिले आन्दोलन सुरु गरेको छ। आन्दोलनअन्तर्गत आजदेखि जिल्ला प्रशासन कार्यालय धनुषा अगाडि बिहान ११ बजेदेखि धर्ना कार्यक्रम सुरु भएको छ।
प्रदेश अध्यक्ष श्यामप्रसाद बञ्जाराले आन्दोलनको नेतृत्व नेपाल पत्रकार महासंघ धनुषा शाखाले गर्ने जानकारी दिएका छन् भने शाखा अध्यक्ष पुरण गुप्ताले सम्पूर्ण पत्रकारलाई कार्यक्रममा सहभागी हुन आग्रह गरेका छन्।
गत साउन २७ गते गुठी संस्थानमार्फत कानुनी प्रक्रियाबाट प्राप्त चार कठ्ठा जग्गा संरक्षणको क्रममा नेपाल बार एसोसिएसन जनकपुरका पदाधिकारीसहितका वकिलहरूले पत्रकारमाथि आक्रमण गरेका थिए। आक्रमणमा महासंघ मधेश प्रदेश अध्यक्ष श्याम बञ्जारा, उपाध्यक्ष ज्योति झा, महासचिव शैलेन्द्र महतो क्रान्ति, पत्रकार दिवाकर राय र अनिल निराला घाइते भएका थिए।
सो घटनापछि संलग्न पाँच जना वकिलविरुद्ध साउन २८ गते नै जिल्ला प्रहरी कार्यालय धनुषामा जाहेरी दिइएको थियो। तर प्रहरीले हालसम्म उनीहरूलाई पक्राउ गरी कानुनी कारबाही नगरेको भन्दै महासंघ आन्दोलनमा उत्रिएको हो। शनिबार पत्रकार महासंघ धनुषा शाखामा बसेको भेलाले प्रहरी प्रशासनको लापरबाहीविरुद्ध आन्दोलन गर्ने निर्णय गरेको थियो।
