रामेछाप– मन्थलीमा शनिबार सम्पन्न ११औँ जगदीश घिमिरे स्मृति साहित्यिक सभा तथा पुरस्कार वितरण समारोहमा प्रतिष्ठानले आफ्नो साहित्यिक अभियानलाई निरन्तरता दिएको छ।
कार्यक्रममा प्रतिष्ठानले यस वर्षको जगदीश घिमिरे स्मृति पुरस्कार साहित्यकार पवन आलोक र गत वर्षका लागि मिना चौलागाईलाई ५१\५१ हजार रुपैयाँ नगदसहित प्रदान गरेको हो। गत वर्ष पुरस्कार वितरण हुन नसकेकाले यस वर्ष दुवै साहित्यकारलाई एकै समारोहमा सम्मान गरिएको प्रतिष्ठानले जनाएको छ।
प्रतिष्ठानकी अध्यक्ष दुर्गा घिमिरेको अध्यक्षतामा भएको कार्यक्रममा साहित्यकार र विद्यार्थीबीच वक्तृत्वकला प्रतियोगिता समेत आयोजना गरिएको थियो। प्रतिष्ठानले नयाँ पुस्तामा साहित्य र अभिव्यक्ति कलाप्रति रुचि बढाउने उद्देश्यका साथ प्रतियोगिता सञ्चालन गरेको जनाएको छ।
वरिष्ठ साहित्यकार जगदीश घिमिरेले जीवित रहँदै स्थापना गरेको प्रतिष्ठानले हरेक वर्ष साहित्यिक गतिविधि, पुरस्कार वितरण र साहित्य सम्मेलन आयोजना गर्दै साहित्यिक अभियानलाई निरन्तरता दिँदै आएको छ।
घिमिरेले मन्थलीमा साहित्य सम्मेलनको थालनी २०६३ सालदेखि गरेका थिए। उनका कृति अन्तर्मनको यात्रा ले वि।सं। २०६४ सालमा मदन पुरस्कार प्राप्त गरेको थियो भने उनले मैनाली कथा पुरस्कार र उत्तम शान्ति पुरस्कार पनि पाएका थिए।
२०७० साल कात्तिक १४ गते क्यान्सरका कारण ६८ वर्षको उमेरमा निधन भएका घिमिरेको स्मरण गर्दै प्रतिष्ठानले साहित्यिक अभियानलाई निरन्तरता दिँदै आएको छ।
