रामेछाप । घरघरमा चिठ्ठीपत्र पुर्याएर नागरिकहरुका आफन्तहरुको समाचार आदान–प्रदान गर्ने मुख्य जिम्मेवारी लिएको हुलाक कार्यालयको प्रभावकारीता पछिल्लो समयमा घट्दै गएको छ ।
बिगतको वर्षहरुमा जिल्लाका विकट गाउँहरुसम्म चिठीपत्र र उनीहरुको आफन्तहरुले पठाएका रजिष्ट्रि चिठ्ठीहरु डाँकसेवा मार्फत घरघरमा पुर्याउनका लागि सरकारले स्थापना गरेको हुलाक कार्यालयको कामहरु वढ्दो प्रबृधी मैत्रीको विकाससँगै अप्रभावकारी हुँदै गएका हुन् । पंञ्चायतकालदेखी नै सेवा आरम्भ गरेको हुलाक कार्यालयले जिल्ला हुलाकको अलावा साविकका गाविस पिच्छे माताहत हुलाक स्थापना गरी कर्मचारी मार्फत काम गर्दै आएको थियो ।
अहिले कुनै पनि हुलाकका कर्मचारीहरु पत्र बोकेर कसैको घरमा जान छाडेको स्थानियहरुको भनाई रहेको छ । लामो समयदेखी हुलाक सेवाको भरमा आफन्तको चिठ्ठी चपेटामा भर गर्दै आएका मन्थली नगरपालिका–१ का हरिकृष्ण दाहाल भन्छन्– पहिला त हाम्रा लागि हुलाक सेवाले गर्ने काम निकै प्रभावकारी थियो । तर अहिले हुलाकका कर्मचारीहरुसँग भेट गर्न नपाएको दश वर्षजति भएको उनको भनाई छ । हाम्रो काम हुलाकसँग नभएपछि हामी हुलाक पनि जान छाडेका छौं भने हामीसँग हुलाकको काम नभएपछि हुलाकका कर्मचारीहरु पनि हाम्रो घरतिर आउन छाडेका छन् ।
प्रबृधिको विकाससँगै सबैजसोका आफन्तहरु रोजगारको लागि बाहिरी जिल्लामा बसेर पठाउँदै आएका पत्रको अन्त भएसँगै पनि हुलाक मार्फत पत्राचार गर्ने चलनको अन्त्य भएको छ । मोबाइल र इन्टरनेट सेवा गाउँगाउँमा पुगेसँगै हुलाकमा काम गर्ने सबै कर्मचारीहरु फुर्सदिला भएपछि कार्यालयमा रहेका कर्मचारीहरु काम बिहिन भएका छन् । अधिकासंले डिउटी मिलाएर घरमा नै बस्ने गरेका छन् भने कार्यालयमा बस्नेहरुले पनि घाम तापेर समय पास गर्ने गरेका छन् ।
हाल जिल्ला हुलाक कार्यालय रामेछापमा १८ जना हल्कारा र ३२ जना हुलाकी कार्यरत रहेका छन् । त्यसवाहेक १० वटा इलाका हुलाक र ४४ वटा अतिरित्त हुलाकमा गरी १ सय २९ जना डाँक बाहक र पत्र बितरक प्रतिनिधि रहेका छन् । उनीहरु सबैजसो फुर्सदिलो अवस्थामा दिन काट्दै आएका छन् । तर कार्यालयले भने आफ्ना कर्मचारीहरुको डिउटी व्यवस्थापनको प्रक्रियालाई मिलाएको दावी गर्दै आएको छ ।
यसवारेमा कार्यालयसँग सम्र्पक गर्दा कार्यालय प्रमुखको फोन सम्र्पक हुननसके पनि कार्यालयको श्रोतले बिगतको तुलनामा अहिले आफ्ना कर्मचारीहरुको काममा खासै लोड नभएपनि उनीहरुलाई सम्वन्धित हुलाक कार्यालयमा नियमित डिउटी जानुपर्ने अवस्था भने रहेको छ । श्रोतका अनुसार बिशेष गरी सरकारी तथा गैरसरकारी संस्था, बित्तिय संस्थाहरुको कहिलेकाहीँ हुलाक मार्फत डकुमेन्ट आउने गरेकाले र एउटै मात्रा भएपनि बोकेर गाउँमा पुग्नुपर्ने अवस्था भने अहिले पनि रहेको सो कार्यालयले जनाएको छ ।
