रामेछापको गोकुलगङ्गा गाउँपालिकामा आयोजना गरिएको छैठौँ राष्ट्रपति रनिङशील्ड खेलकुद प्रतियोगिता सम्पन्न भएको छ। मङ्सिर १९ गतेदेखि वडा नम्बर ५, नामाडीमा सुरु गरिएको प्रतियोगिता हिजो आइतबार औपचारिक रुपमा समापन गरिएको हो।
प्रतियोगितामा शारदा माध्यमिक विद्यालय च्याम्पियन बनेको छ। फाइनलमा गोकुलगङ्गा माध्यमिक विद्यालयलाई पछि पार्दै शारदामाध्यमिक विद्यालयले विजेता उपाधि चुम्न सफल भयो। विजेता टिमले ८ स्वर्ण, ७ रजत र ५ कास्य सहित २० पदक आफ्नो पक्षमा पारेको थियो।
उपविजेता बनेको गोकुलगङ्गा माविले ८ स्वर्ण, ५ रजत र ९ कास्य गरी २२ पदक प्राप्त गर्यो। जनजागृति माध्यमिक विद्यालय ७ स्वर्ण र ८ रजत सहित तेस्रो स्थानमा रह्यो। समापन समारोहमा उत्कृष्ट तीनै विद्यालयलाई शिल्ड, ट्रफि, मेडल तथा प्रमाणपत्र प्रदान गरिएको थियो।
समारोहमा गाउँपालिका अध्यक्ष काजी बहादुर खड्का (दिनेश)ले खेलकुदमार्फत गोकुलगङ्गाको पहिचान अझ मजबुत बनाउन खेलाडीलाई शुभकामना व्यक्त गरे। प्रतियोगितालाई सफल बनाउन सहयोग गर्ने विद्यालय, शिक्षक तथा खेलाडी सबैलाई धन्यवाद व्यक्त गर्दै उनले प्रत्येक वर्ष फरक वडामा प्रतियोगिता आयोजना गरिने परम्पराअनुसार आगामी संस्करण वडा नम्बर ६, फपुमा आयोजना हुने जानकारी दिए।
