एजेन्सी – रियल मड्रिडले मंगलबार राति भएको आफ्नो पहिलो ला लिगा खेलमा ओसासुनालाई १(० ले पराजित गर्दै नयाँ सिजनको विजयी सुरुवात गरेको छ। खेलको एकमात्र गोल ५१औँ मिनेटमा केलियन एमबाप्पेको पेनाल्टीमार्फत आएको थियो। खेलमा दायाँ विंगबाट बल अघि बढाएका एमबाप्पेलाई ओसासुनाका डिफेन्डरले फाउल गरेपछि रियलले पेनाल्टी पाएको थियो। रियलले खेलमा पूर्ण नियन्त्रण राख्दा पनि थप गोल हासिल गर्न सकेन।
यो खेल रियलका नयाँ प्रशिक्षक साबी अलोन्सोको पहिलो आधिकारिक लिग खेल पनि थियो। अलोन्सोले नयाँ सिजनमा तीन नयाँ डिफेन्डर—आल्भारो कार्रेरास, ट्रेन्ट अलेक्ज्यान्डर–आर्नोल्ड र डिन होइसेन—लाई पहिलो रोजाइमा राखेका थिए। उनले कार्लो एन्सेलोटीको स्थान लिएर क्लब वर्ल्ड कप अघि नै टोली सम्हालेका थिए। एन्सेलोटीले ब्राजिलको राष्ट्रिय टोली सम्हाल्न रियल छाडेका थिए।
ओसासुनाका एक खेलाडी अन्तिम समयमा रातो कार्ड पाए भने रियलका युवा खेलाडी फ्राङ्को मस्तान्तुआनोले दोस्रो हाफमा मैदान प्रवेश गर्दै समर्थकको ध्यान खिचे। रियलले धेरै राम्रो मौका सिर्जना गर्यो भने ओसासुनाले अधिकांश समय रक्षात्मक खेल खेल्यो। पहिलो हाफमा एमबाप्पेको अर्को प्रहार पोष्टमाथिबाट नाघेको थियो।
गत सिजन रियल मड्रिड लिगमा बार्सिलोनापछि दोस्रो स्थानमा रहेकी थियो। ओसासुनाले भने गत सिजन नवौँ स्थान हासिल गरेको थियो। नयाँ सिजनमा बार्सिलोनाले पनि जितसँगै राम्रो सुरुवात गरिसकेको छ।
