रामेछाप । आगामी फागुन २१ गते हुने प्रतिनिधिसभा निर्वाचनका लागि आवश्यक निर्वाचन सुरक्षा जनशक्ति व्यवस्थापनमा रामेछापमा समस्या देखिएको छ । निर्वाचन सुरक्षाका लागि माग गरिएको म्यादी प्रहरी (निर्वाचन प्रहरी) पदमा दोस्रो पटक म्याद थपेर सूचना प्रकाशन गर्दा पनि आवश्यक संख्यामा आवेदन नपरेपछि जिल्लामा म्यादी प्रहरी संकट देखिएको हो ।
जिल्ला प्रहरी कार्यालय रामेछापले पहिलो चरणमा माघ १ गतेसम्म आवेदन दिन सकिने गरी सूचना प्रकाशन गरेको थियो । नेपाल प्रहरीका लागि १ हजार ३ सय ३३ जना र सशस्त्र प्रहरीका लागि ९६ जना गरी कूल १ हजार ४ सय २९ जना म्यादी प्रहरी माग गरिएकोमा पहिलो चरणमै मागअनुसार आवेदन नआएपछि दोस्रो पटक म्याद थप गर्दै माघ ३ गतेसम्म आवेदन आह्वान गरिएको थियो ।
दोस्रो पटक म्याद थप गर्दा पनि कूल ९ सय ६० जनाले मात्रै आवेदन दिएको जिल्ला प्रहरी कार्यालय रामेछापका सूचना अधिकारी प्रहरी निरीक्षक राजनप्रसाद तिमिल्सिनाले जानकारी दिए । माग गरिएको संख्याको तुलनामा उल्लेख्य रूपमा कम आवेदन परेपछि जिल्लामा निर्वाचन सुरक्षालाई लिएर चुनौती थपिएको बताइएको छ ।
प्रहरीका अनुसार १८ वर्ष उमेर पूरा भई नागरिकता प्रमाणपत्र वा शैक्षिक प्रमाणपत्र भएका तथा शारीरिक रूपमा सक्षम युवालाई लक्षित गरी आवेदन आह्वान गरिएको थियो । तर, गाउँ–घरका अधिकांश युवा वैदेशिक रोजगारीमा गएकाले र जिल्लामै रहेका युवाहरू पनि पछिल्लो समय देखिएको राजनीतिक तथा सामाजिक अस्थिरताका कारण म्यादी प्रहरीप्रति आकर्षित हुन नसकेको बुझिएको छ ।
केही युवाहरू आवेदन दिन इच्छुक भए पनि आउँदो निर्वाचनका क्रममा द्वन्द्व वा अशान्ति हुन सक्ने त्रासका कारण परिवारकै दबाबमा भर्ना प्रक्रियाबाट टाढा रहेको प्रहरीको भनाइ छ । आवेदन दिन मन्थली आएका एक युवाले घरपरिवारको असहमतिको बाबजुद आफू बलजफ्ती आएर फाराम भरेको प्रतिक्रिया दिएका छन् ।
यसरी दुई पटक सूचना प्रकाशन गर्दा पनि आवश्यक जनशक्ति पूरा हुन नसकेपछि जिल्ला प्रहरी कार्यालयले आइतबारसम्म सम्पर्कमा आउने इच्छुक युवालाई समेत समेट्ने तयारी गरेको जनाएको छ । म्यादी प्रहरी अभावकै बीच निर्वाचन सुरक्षाको व्यवस्थापन कसरी प्रभावकारी बनाइन्छ भन्ने विषय अहिले रामेछापमा चासोको विषय बनेको छ ।
