रामेछाप । नेकपा (माओवादी केन्द्र)बाट निर्वाचित दोरम्बा शैलुङ गाउँपालिकाकी पूर्वउपाध्यक्ष कृशला घिसिङले पार्टी परिवर्तन गर्दै उज्यालो नेपाल पार्टी रोजेकी छन्।
लामो समय कम्युनिस्ट आन्दोलनमा सक्रिय रहेकी घिसिङ आइतबार औपचारिक रूपमा उज्यालो नेपाल पार्टीमा सहभागी भएकी हुन्। उनी २०७४ सालको स्थानीय तह निर्वाचनमार्फत दोरम्बा शैलुङ गाउँपालिकाको उपाध्यक्षमा निर्वाचित भएकी थिइन्।
घिसिङले पुराना राजनीतिक दलहरूले नयाँ पुस्ताको सोच, भावना र अपेक्षा समेट्न नसकेको भन्दै असन्तुष्टि व्यक्त गरिन्। पारदर्शिता, जवाफदेहिता र उत्तरदायी राजनीतिका लागि उज्यालो नेपाल पार्टी उपयुक्त विकल्प भएको उनको भनाइ छ।
उज्यालो नेपाल पार्टीका संरक्षक कुलमान घिसिङको गृहजिल्ला रामेछापमा पछिल्लो समय पार्टीप्रति आकर्षण बढ्दो देखिएको छ। यसअघि माओवादी केन्द्रका प्रभावशाली नेता तथा पूर्व जनप्रतिनिधि रामकृष्ण लामा, खड्ग घिसिङ, अन्जान लामा लगायतका नेताहरू पनि उज्यालो नेपाल पार्टीमा प्रवेश गरिसकेका छन्।
एकपछि अर्को गर्दै स्थानीयस्तरका नेताहरू पार्टी परिवर्तन गर्न थालेपछि रामेछापको राजनीतिक समीकरणमा परिवर्तन आउने संकेत देखिएको छ। माओवादी केन्द्रबाट निर्वाचित जनप्रतिनिधिहरूको निरन्तर पार्टी परित्यागले पुराना दलप्रतिको जनविश्वास कमजोर बन्दै गएको र नयाँ राजनीतिक शक्तिको प्रभाव विस्तार हुँदै गएको आकलन गरिएको छ।
