शनिबारदेखि परेको अविरल वर्षा र रोशी खोलाको बाढीले बिपी राजमार्गको काभ्रेपलाञ्चोक खण्ड सोमबार बिहानसम्म पनि सञ्चालनमा आउन सकेको छैन। डिभिजन सडक कार्यालय भक्तपुरले आइतबार साँझसम्म सडक खुलाउने प्रयास गरे पनि पुनः वर्षा भएपछि डाइभर्सन निर्माणमा अवरोध पुगेको हो।
विशेषगरी चारसयबेँसी र घुमाउने क्षेत्रमा डाइभर्सन बगाएपछि आवागमन ठप्प छ। इन्जिनियर दीपक याकामीका अनुसार सोमबार बिहानैदेखि मेसिन परिचालन गरी डाइभर्सनको कामलाई निरन्तरता दिइएको र मौसमले साथ दिए दिउँसोसम्म सडक सञ्चालनमा ल्याइने तयारी छ। रोशी खोलामा आएको बाढीले कटुन्जे–मंगलटार खण्डका विभिन्न आठ स्थानमा करिब चार किलोमिटर अस्थायी सडकमा क्षति पुर्याएको छ।
शनिबार दिउँसो साढे ३ बजेदेखि नै सुरक्षा संवेदनशीलतालाई ध्यान दिँदै प्रहरीले सवारी आवागमनमा रोक लगाएको थियो। राजमार्ग अवरुद्ध हुँदा अलपत्र परेका ६ सयभन्दा बढी यात्रुलाई आइतबार झोलुङ्गे पुलमार्फत तेमाल हुँदै भकुण्डेतर्फ उद्धार गरिएको छ। गत वर्षकै बाढीले क्षतिग्रस्त भएको यस खण्डमा हाल खोलाको बगरबाटै अस्थायी ट्रयाक बनाएर सवारी चलाइँदै आएकोमा सानो वर्षा हुँदा पनि पटक-पटक अवरोध सिर्जना हुने गरेको छ। अहिले धुलिखेल, भकुण्डे र नेपालथोक क्षेत्रमा सयौँ सवारी साधनहरू बीच बाटोमै रोकिएका छन्।
