रामेछाप । चारवर्षसम्म बैदेशिक रोजगारीको लागि खाडी मुलुक मलेसियामा बसेर पसिना बगाएका दोरम्वा गाउँपालिका वडा नं १ मेघ्रेका राजन खड्का गाउँ फर्किएसँगै आफ्नै जग्गामा नर्सरी स्थापना गरेर लाखौ कमाउन सफल भएका छन् ।
राजनले सातवर्ष अघि जिल्लामा रोजगारी खोज्दै धेरै पटक सदरमुकाम लगाएतका स्थानमा धाए । जिल्लामा केही पनि रोजगारी नभेटेपछि उनी रोजगारीकै लागि राजधानी काठमाण्डौं हानिए । उनले काठमाण्डौंमा पनि आफुले सोचेजस्तो काम पाएनन् । त्यसपछि धेरै रकम कमाउने आकाक्षां लिएर खाडीमुलक मलेसिया जाने निधो गरेका उनी आवश्यक कागजात तयार गरेर एजेन्ट मार्फत तत्कालै मलेसिया हानिए ।
धेरै रकम कमाउने आशा लिएर मलेसिया पुगेका खड्काले त्यहाँ पुगेपछि पनि सोचेजस्तो काम पाएनन् । गएदेखी नै आफ्नै सम्झेर जसोतसो ४ वर्ष मलेसियामा पसिना बगाए । चारवर्ष पुरा भएपछि पुनः नेपाल फर्कने र गाउँकै पाखो रेखोमा कृषी व्यवसाय सञ्चालन गर्ने निचोड खड्काले निकाले । मलेसियामा बस्दा कमाएको केही रकम लिएर उनी चारवर्षपछि नेपाल फर्कीए ।
खड्का भन्छन् जब देश छाडेर मलेसिया पुगेर काम गर्थे त्यतीखेर झलझली आफ्नो देश र आफ्नो घर परिवार र जग्गाजमीन आखाँमा आउथ्यो । उनले विदेशमा वस्दा गरेको दुःख र वगाएको पसिना सम्झेर आफ्नो गाउँ फर्किएर कृषि व्यवसायमा लागेका छन् । अहिले उनले आफ्नै जमिनमा नर्सरी स्थापना गरेका छन् ।
गाउँमा नर्सरी स्थापना गरेका खड्काले अहिले किवी, जुनार, सुन्तला, कागती लगाएतका विरुवा उत्पादन गर्दै आएका छन् । घर परिवारका सदस्यहरुसँग रमाउँदै आफ्नै ३ रोपनी खेतमा नर्सरी वाट वार्षिक ४ लाख देखी ७ लाख रुपैयाँसम्म कमाइ हुने गरेको राजन खड्काले जानकारी दिए । उनले भने– धेरै कमाई हुन्छ होला भनेर सवै परिवार छाडेर अर्कैको देशमा गए । आखिर त्यहाँ पनि पैसा फल्ने बोट हुदोरहेनछ । दुःख नै गर्नुपर्दा आफ्नै गाउँमा गर्छु भन्ने लागेर आफ्नै देश फर्किएको खड्का बताउँछन् ।
अहिले खड्कालाई नर्सरीमा रहेका विरुवा गोडमेल गर्न, पानी हाल्ने लगाएतका कामहरुमा उनकी श्रीमती तुलसी खड्काले साथ दिदै आएकी छिन् । खड्काका दम्पती दैनिक घरको काम सकेर वाँकी रहेको समय नर्सरी खेतीलाई दिदै आएका छन् । नर्सरीमा उत्पादन भएका विरुवा खरिद गर्न रामेछापका अलावा सिन्धुली, काभ्रे, भक्तपुर लगाएतका जिल्लाहरुवाट किसानहरु गाउँमै आउने गरेको खड्का बताउँछन् ।
उनी भन्छन् कहिले नर्सरीमा उत्पादन भएको विरुवा माग धेरै भएको समयमा पुर्याउनै सकिदैन । कुनै वर्ष त्यती धेरै माग आउँदैन् । नर्सरीमा विरुवा ठूलो बनाएर राखेर बिक्री गर्नुपर्ने अवस्था आउने गर्छ । जे जस्तो भएता पनि अहिले म आफ्नै गाउँमै बसेर परिवारसँगै काम गर्न पाउँदा धेरै खुशी लागेको खड्काले बताए ।
