हेटौंडा । बागमती प्रदेश सरकारको नेतृत्व सम्हालिरहेका नेपाली कांग्रेसका नेता तथा मुख्यमन्त्री बहादुरसिंह लामाविरुद्ध दर्ता गरिएको अविश्वास प्रस्तावमाथि आज मंगलबारबाट औपचारिक प्रक्रिया अघि बढ्ने भएको छ। नेपाली कांग्रेस बागमती प्रदेश संसदीय दलमा लामाविरुद्ध २१ जना बहुमत सांसदले प्रस्ताव दर्ता गरेका हुन्।
सांसदहरूले लामाविरुद्ध अविश्वास प्रस्ताव दर्ता गर्दै इन्द्रबहादुर बानियाँलाई नयाँ दलको नेता चयन गर्न अनुरोध गरेका छन्। संसदीय दलका सचिव कृष्ण तामाङका अनुसार आज बिहान १० बजेदेखि प्रस्तावमाथिको प्रक्रिया अगाडि बढ्नेछ। संसदीय दलको कार्यालयले प्रस्तावमा हस्ताक्षर गर्ने सांसदहरूको सनाखत गराउने तयारी गरेको छ।
सोमबार राति मुख्यमन्त्री लामा र बानियाँ पक्षबीच १० बजेबाट प्रक्रिया अघि बढाउने सहमति भएपछि आजको दिन निर्णायक बन्ने देखिएको हो। बानियाँ पक्षले यो विषय तत्काल टुंगोमा पुर्याउनुपर्ने अडान राख्दै आएको छ भने लामा पक्षले मन्त्री काफ्लेको विदेश भ्रमण लगायतका कारण देखाउँदै ढिलो गर्ने प्रयास गरेको थियो।
पूर्वमन्त्रीहरू सुरजचन्द्र लामिछाने, मीनकृष्ण महर्जन, विमल ठकुरी र मदुकुमार श्रेष्ठले राजीनामा दिएर लामाविरुद्धको प्रस्तावमा समर्थन जनाएपछि राजनीतिक अवस्था थप जटिल बनेको हो। राजीनामापछि लामा आफैंले प्रदेश प्रमुखलाई उनीहरूलाई पदमुक्त गरिएको पत्र पठाएका थिए।
प्रदेशसभामा नेपाली कांग्रेसका ३७ जना सांसद छन्। दलको नेता बन्नका लागि कम्तीमा १९ सांसदको समर्थन आवश्यक पर्छ। अविश्वास प्रस्तावमाथि मतविभाजन हुँदा बहुमत जुटाउन नसके लामा नैतिक रूपमा मुख्यमन्त्री पदबाट हट्नुपर्ने दबाबमा पर्नेछन्। तर, बहुमत पुनः आफ्नो पक्षमा पार्न सके उनी पदमा यथावत रहनेछन्।
२०७९ पुस १३ गते संसदीय दलको नेताका लागि भएको निर्वाचनमा लामा २१ मत ल्याएर निर्वाचित भएका थिए भने बानियाँ १६ मतमा सीमित भएका थिए। पहिलो कार्यकालमा बानियाँ दलको नेता भए पनि मुख्यमन्त्री बन्न भने सकेका थिएनन्।
पार्टी केन्द्रले बागमतीको विवाद मिलाउन केन्द्रीय सदस्य राजन केसीलाई खटाएको छ। केसी आइतबारदेखि हेटौंडामा रहँदै दुबै पक्षसँग संवादमा जुटिरहेका छन्।
