रामेछाप । दोलखाको तामाकोशी गाउँपालिका–५ स्थित खिम्ती ग्रामीण विद्युत सहकारी संस्थाले उपभोक्ताका माग अनुसार विद्युत महसुल अनलाइनमार्फत तिर्न मिल्ने व्यवस्था लागू गर्ने निर्णय गरेको छ । रामेछापको मन्थली नगरपालिका–१२ का उपभोक्ता सञ्जय बुढाथोकी आइतबारदेखि आमरण अनशनमा बसेपछि सोमबार सहकारी र बुढाथोकीबीच भएको छलफलमा उक्त सहमति बनेको हो । सहमति पश्चात् बुढाथोकीले अनशन तोडेका छन् ।
बुढाथोकीले विद्युत महसुल बुझाउन उपभोक्ताले लामो दूरी हिँड्नुपर्ने, लाइन लाग्ने, कार्यालय पुग्न नसक्ने समस्या भएकाले अनलाइन माध्यम उपलब्ध गराउनुपर्ने माग अघि सारेका थिए । साथै उनले विद्युत महसुल घटाउनुपर्ने अतिरिक्त माग पनि प्रस्तुत गरेका थिए । उपभोक्ताको सहजताका हिसाबले सहकारीले अनलाइन प्रणाली लागू गर्न सहमति जनाएको भए पनि महशुल घटाउने विषय अहिले नै निर्णय गर्न नसकिने सहकारीका अध्यक्ष नानीबाबु बस्नेतले स्पष्ट पारेका छन् ।
दुवै पक्षबीच पुगेको सहमति अनुसार सहकारीले आगामी २०८३ साल वैशाखदेखि अनलाइनमार्फत महसुल तिर्न मिल्ने व्यवस्था कार्यान्वयन गर्नेछ । त्यससँगै आवश्यक स्थानमा अतिरिक्त महसुल संकलन केन्द्र खोल्ने, मिटर रिडरमार्फत पनि बिल बुझाउन सकिने व्यवस्था मिलाउने र आकस्मिक मर्मतका लागि तत्काल टोली परिचालन गर्ने निर्णय पनि गरिएको छ । सहकारीले जारी गरेको विज्ञप्तिमा यी सबै निर्णयहरू आगामी वैशाखदेखि पूर्णरूपमा लागू हुने उल्लेख छ । स्थानीय उपभोक्ताका समस्या सुनेर सहकारीले गरेको निर्णयले विद्युत सेवा थप सहज, आधुनिक र पहुँचयोग्य हुने अपेक्षा गरिएको बुढाथोकीले बताए ।