रामेछाप । बागमती प्रदेशका मुख्यमन्त्री अष्टलक्ष्मी शाक्यलाई मुख्यमन्त्री पद जोगाउनु सास्ती परेको छ । माधवकुमार नेपाल समूहकी अष्टलक्ष्मी शाक्य अचानक ‘यु टर्न’ हुँदै ओली समूहकै सहयोगमा वाग्मती प्रदेशका मुख्यमन्त्री बनेका हुन ।
वाग्मती प्रदेशमा नेकपा एमालेका ५६, माओवादी केन्द्रका २३, कांग्रेसका २२ जना, विवेकशील साझाका ३ जना, मजदुर किसान पार्टीका २ जना, राप्रपाका २ र १ जना स्वतन्त्र गरी १०९ सांसद् रहेका छन् । नेकपा एमाले विभाजन अघि वाग्मती प्रदेशमा केपी ओली पक्षका ३४ र माधव नेपाल पक्षका २२ जना सांसद् रहेका थिए । यदि नेपाल समुहमा शाक्य नभएको खण्डमा गठबन्धनले अविस्विासको प्रस्ताब राखेको खण्डमा शाक्यले बहुमत पुर्याउन सक्ने आधार रहदैन । उता शाक्यले टिम परिवर्तन नगरे उनको पद अबको १५ दिनसम्म मात्र रहने ओली पक्षको भनाइ छ । पार्टी दर्ता भएको १५ दिनमा टुंगो लाग्ने बित्तिकै नेकपा एमालेमा दुई धार हुने हुँदा उनलाई मुख्यमन्त्रीको पद जोगाउन कठिन देखिएको हो ।
डोरमणि पौडेल नेतृत्वको सरकारमाथि निरन्तर धावा बोल्दै आएकी माधवकुमार नेपाल समूहकी शाक्य अचानक ‘यु टर्न’ हुँदै ओली समूहकै सहयोगमा वाग्मती प्रदेशी मुख्यमन्त्री बनेका हुन । माधव पक्ष पार्टी विभाजनपछि दर्ता प्रक्रियामा रहेका बेला शाक्य एकाएक ओली टिमबाट मुख्यमन्त्री बन्दा राजनीतिक विश्लेषक समेत चकित परेका छन् । उनले पार्टी एकताका लागि मुख्यमन्त्री बनेको भन्दै देश र जनताका आवश्यकतालाई मध्यनजर गर्दै प्रदेश सरकारले काम गर्ने दाबीसमेत गरेका छन् ।
तर, एमाले विभाजन भइसकेको छ । नेपाल समूहको दलले आधिकारिकता पाएपछि कांग्रेस, माओवादी केन्द्र र जसपासँगको गठबन्धनले ढिलो–चाँडो उनीविरुद्ध अविश्वास प्रस्ताव ल्याउन सक्ने छ ।
हालको अंक गणितअनुसार नेकपा एमाले वाग्मती प्रदेश संसदीय दलमा २ जना प्रदेशसभा सदस्यले साथ छाडे शाक्य अल्पमतमा पर्नेछिन । १५ दिनपछि एमाले समाजवादीमा आउने आशा बोकेका माधव पक्षीय नेताहरु शाक्यलाई गठबन्धनबाट बहुमत पु¥याएर नेकपा एमालेलाई प्रमुख प्रतिपक्ष दल बनाउने दाउमा छन्। त्यसकारण शाक्यको मुख्यमन्त्रीमा भविष्य १५ दिनपछि कस्तो हुने भन्ने टुंगो लाग्ने बताइन्छ ।
नेकपा माओवादी केन्द्र वाग्मती प्रदेश संसदीय दलका नेता शालीकराम जम्कट्टेलले दल विभाजनपछि निर्णय लिने बताउँदै हाल एकल बहुमतको सरकार भएका कारण अविश्वास प्रस्ताव दर्ता नहुने बताएका छन । नेपाली कांग्रेस वाग्मती प्रदेशमा प्रवक्ता प्रभात तामाङले भने पौडेलको सरकार ढल्ने भएपछि शाक्यलाई मोहरा बनाएर मुख्यमन्त्री बनाइएको आरोप लगाएका छन । उनले पार्टी विभाजन भइसकेपछि माधव पक्षतिर आएमात्र नेपाली कांग्रेसले विश्वासको मत दिने र ओली गुटमै बसेको अवस्थामा भने विश्वासको मत दिन नसकिने भन्दै केही दिनमै शाक्य सरकार ढल्ने दाबी गरे । उनले शाक्यले निर्णय लिन नसके अर्को सरकार चयनको प्रक्रिया सुरु हुने बताए ।