दोलखा । दोलखाको वैतेश्वर गाउँपालिका–४ का एक परिवारलाई कोरोना र आगलागीले एकैसाथ पिडा दिएको छ । आगलागीले घर जलेर ध्वस्त भएपछि कोरोना संक्रमित परिवारलाई बस्न र खान समस्या भएको छ । वैतेश्वर गाउँपालिका –४ काब्रेस्थित सिद्धाकोथान घर भएका गंगाबहादुर दाहालको घर गत जेठ ३ गत जलेर नष्ट भएको थियो । घर जलेर नष्ट भएको पिडा कम नहुँदै कोरोनाले थप पिडा थपि दिएको छ । आगलागीका कारण घर जलेर पूर्णरुपमा नष्ट भएपछि घरविहिन बन्न पुगेका दाहालको परिवारमा एक जनालाई कोरोना संक्रमण पुष्टि भएपछि झन् तनाव थपिएको छ ।
आगलागीका कारण उनीहरुको घरमा भएको महत्वपूर्ण कागजात, २ लाख नगद, ८ तोला गरगहना, खाद्यान्न,लत्तकपडा लगायतका सामाग्रीहरु जलेर नष्ट हुँदा लाखौंको क्षेति हुन पुगेको थियो ।
घर जलेर नष्ट भएको पिडा भइरहेका बेला कोरोना संक्रमणको आशंका स्वाव परीक्षण गराएकी २७ वर्षीय बुहारीलाई भोलिपल्ट कोरोना संक्रमण पुष्टि भयो । यो खबरले दाहाल परिवारमा यतिबेला झनै तनाव थपिएको छ । आगलागी पछि घर नभएर त्रिपालको सहारामा बसिरहेको दाहाल परिवारलाई अहिले कोरोना संक्रमणवाट परिवारका सदस्य कसरी जोगिने भन्ने चिन्ताले सताएको छ । कोरोना संक्रमित बुहारी र परिवारका सदस्य छुट्टाछुट्टै बस्नु पर्ने, स्वास्थ्य सुरक्षाको मापदण्ड अपनाउनु पर्ने भएपनि घर र आवासको अभावले उनीहरुलाई निकै समस्या परेको छ ।