रामेछाप । दैलेखका पत्रकार डेकेन्द्रराज थापाको हत्यामा संलग्न एक फरार अभियुक्तलाई १६ वर्षपछि प्रहरीले पक्राउ गरेको छ ।
पत्रकार थापाको हत्यामा संलग्न भई फरार रहेका दैलेख महाबु गाउँपालिका वडा नं–६ का ६८ वर्षिय जयबहादुर शाहीलाई जिल्ला प्रहरी कार्यालय दैलेखबाट खटेको प्रहरी टोलीले लुकिछिपी बसेको अवस्थामा पक्राउ गरेको हो । पक्राउ परेका शाहीलाई जिल्ला अदालतमा पेश गरिने जिल्ला प्रहरी कार्यालय दैलेखका प्रहरी नायव उपरिक्षक अनुप श्रेष्ठले जानकारी दिए ।
उनका अनुसार– पक्राउ परेका शाहीलाई जिल्ला अदालत दैलेखबाट २ वर्ष कैद सजाय तोकिएको छ । फरार अभियुक्त शाहीले पूर्पक्षका लागि १ वर्ष ७ महिना १ दिन सजाय भुक्तान गरिसकेका छन् । बाँकी रहेको सजायको लागि अभियुक्त शाहीलाई कारागार चलान गरिएको छ । १ वर्ष ७ महिना १ दिन कैद भुक्तान गरी बन्दी प्रत्यक्षीकरणमा परेपछि अदालतको फैसला ढिलो आउँदा शाही थुनामुक्त भई फरार भएका थिए ।
दैलेखका पत्रकार डेकेन्द्र द्धन्दकालमा तत्कालिन माओवादीबाट मारिएका थिए । दैलेख बजारको खानेपानी लाइन काटिएपछि समस्या समाधान गर्न बार्ताका बस्ने भन्दै बोलाएपछि पत्रकार उक्त स्थानमा गएका थिए । दैलेखको साबिकको द्वारी गाविस वडा नं–१ मा २०६१ साल साउन २७ गते माओवादी कार्यकर्ताहरुले हत्या गरेका थिए ।
घरबाट खानेपानीको छलफलको लागि हिडेका पत्रकार थापा घर नफर्किएपछि घरपरिवारवाट उनको खोजी भएको थियो । खोजीको क्रममा पत्रकार थापालाई हत्या गरेको अवस्थामा उनको शव फेला परेपछि उनकी श्रीमती लक्ष्मी थापाले जिल्ला प्रहरी कार्यालय दैलेखमा २०६५ साल भदौ ५ गते ९ जना विरुद्ध किटानी जाहेरी दिएकी थिइन । सोही किटानीको जाहेरीको आधारमा प्रहरीले तत्काल नै ५ जनालाई पक्राउ गरी हिरासतमा लिएको थियो ।
