अन्ततः लिखु तामाकोशी गाउँपालिका र श्वेत गंगा हाइड्रोपावरबिच सडक निर्माणका क्रममा उत्पन्न विवाद मिलेको छ। गाउँपालिकाको वडा नम्बर २ मा भएको विवाद समाधान गर्दै दुवै पक्षबिच आपसी सहकार्य गर्ने सहमति भएको हो।
सहमति अनुसार हाइड्रोपावरको पेनस्टक पाईप पछाडि रहेको खहरे खोलाको पानी सेती खोलामा निकास गरिनेछ। यसका लागि दुवै पक्षको प्राविधिक टोलीले निरीक्षण गर्ने र निर्माणमा एक लाख रुपैयाँसम्म खर्च भए हाइड्रोपावर एक्लैले बेहोर्ने छ। सोभन्दा बढी बजेट लागेको खण्डमा भने गाउँपालिका र हाइड्रोपावरले ५०–५० प्रतिशत लागत साझेदारी गरी काम सम्पन्न गर्ने समझदारी भएको छ।
विगतका असमझदारी र उजुरीहरूलाई थाँती राख्दै आगामी दिनमा आपसी समन्वय र सद्भावका साथ अगाडि बढ्ने प्रतिबद्धता दुवै पक्षले जनाएका छन्।
