रामेछाप । रामेछापको गोकुलगंगा गाउँपालिका वडा नं. ६ फर्पुमा सञ्चालन गरिएको ७ दिने उद्घोषण सम्बन्धी तालिम सम्पन्न भएको छ।
वडाका युवायुवतीहरूको क्षमता विकास तथा सार्वजनिक कार्यक्रममा प्रभावकारी रूपमा उद्घोषण गर्न सक्ने दक्ष जनशक्ति तयार गर्ने उद्देश्यले सञ्चालन गरिएको तालिम समापन कार्यक्रममा गोकुलगंगा गाउँपालिकाका अध्यक्ष काजिबहादुर खड्का ले तालिममा सहभागी ४८ जनालाई प्रमाणपत्र वितरण गर्नुभएको थियो।
समापन कार्यक्रममा बोल्दै गाउँपालिका अध्यक्ष खड्काले युवाहरूको व्यक्तित्व विकास, नेतृत्व क्षमता अभिवृद्धि तथा सार्वजनिक प्रस्तुतीकरण सीप विकासका लागि यस्ता तालिमहरू महत्वपूर्ण हुने बताउनुभयो। उहाँले सिकेका ज्ञान र सीपलाई व्यवहारमा उतारेर समाज र समुदायको विकासमा योगदान गर्न सहभागीहरूलाई आग्रह गर्नुभयो।
गोकुलगंगा गाउँपालिका वडा नं. ६ का वडा अध्यक्ष चन्द्र सुनुवार ले वडाका युवायुवतीहरूलाई लक्षित गरी उनीहरूको क्षमता विकास गर्ने उद्देश्यले तालिम सञ्चालन गरिएको जानकारी दिनुभयो। उहाँले तालिमबाट सहभागीहरूको आत्मविश्वास वृद्धि हुनुका साथै सार्वजनिक कार्यक्रम सञ्चालन, भाषण कला तथा सञ्चार सीपमा समेत सकारात्मक प्रभाव परेको बताउनुभयो।
सात दिनसम्म सञ्चालन भएको तालिममा उद्घोषणका आधारभूत सिद्धान्त, कार्यक्रम सञ्चालन विधि, सार्वजनिक भाषण कला, स्वर तथा प्रस्तुतीकरण शैली, मञ्च व्यवस्थापन लगायतका विषयमा प्रशिक्षण प्रदान गरिएको थियो। तालिममा वडा क्षेत्रका ४८ जना युवायुवतीहरूको सहभागिता रहेको थियो। तालिमका सहभागीहरूले यस्ता सीपमूलक तालिमले युवाहरूको व्यक्तित्व विकासमा महत्वपूर्ण योगदान पुग्ने विश्वास व्यक्त गरेका छन्।
Top of Form
Bottom of Form
