रामेछाप– परम्परागत रूपमा सञ्चालन हुँदै आएको आरान व्यवसायलाई आधुनिक र प्रतिस्पर्धी बनाउन सुनापती गाउँपालिका–३ नम्बर वडा कार्यालयले स्थानीय व्यवसायीलाई प्रविधि भित्र्याएको छ । वडाभित्र लामो समयदेखि पुरानै शैलीमा फलामका औजार निर्माण गरिरहेका छ जना आरान व्यवसायीलाई लक्षित गरी आधुनिक विद्युतीय उपकरण हस्तान्तरण गरिएको हो ।
वडा कार्यालयका अनुसार श्रम र समयको बचत गर्दै उत्पादन क्षमता बढाउने उद्देश्यले व्यवसायीहरूलाई जनही एक–एक थान वेल्डिङ मेसिन, कटिङ मेसिन र ब्लोवर मेसिन प्रदान गरिएको छ । आधुनिक प्रविधिको प्रयोगबाट व्यवसाय सञ्चालनमा सहजता आउने र सेवाको गुणस्तर समेत सुधारिने विश्वास लिइएको छ ।
उपकरण हस्तान्तरण कार्यक्रममा बोल्दै वडा अध्यक्ष कुल बहादुर थिङले परम्परागत पेसालाई टिकाइराख्न र व्यवसायीहरूलाई समयसान्दर्भिक रूपमा प्रविधिमैत्री बनाउन यो प्रयास थालिएको बताए । उनले आगामी दिनमा पनि आरान व्यवसायको प्रवर्द्धन र दिगो विकासका लागि थप सहयोगी कार्यक्रमहरू ल्याइने प्रतिबद्धता व्यक्त गरे । पुस्तौँदेखि चलिआएको आरान पेसामा नयाँ प्रविधि जोडिएपछि काम गर्न निकै सहज हुने र स्थानीय स्तरमै गुणस्तरीय सेवा दिन सकिने भन्दै स्थानीय व्यवसायीहरूले खुसी व्यक्त गरेका छन् ।
