पूर्ण खोप सुरक्षित भविष्यु भन्ने मूल नाराका साथ रामेछापको मन्थली नगरपालिका पूर्ण खोप सुनिश्चितता पालिका घोषित भएको छ। सरकारको निर्देशिका बमोजिम १६ देखि ५९ महिनासम्मका सबै बालबालिकाहरूलाई १५ महिनाको उमेरभित्रै पाउनुपर्ने सम्पूर्ण खोप दिलाएर प्रक्रिया पूरा गरेपछि मन्थलीलाई सो प्रमाणपत्र प्रदान गरिएको हो।
शनिबार आयोजित विशेष कार्यक्रममा जिल्ला समन्वय समितिका उपप्रमुख प्रेमबहादुर थापा र जिल्ला खोप समन्वय समितिका सदस्य सचिव एवं जनस्वास्थ्य कार्यालय रामेछापका प्रमुख विभु कुमार झाले मन्थली नगरपालिकाका प्रमुख लब श्रेष्ठ र उपप्रमुख ईश्वरी बस्नेतलाई संयुक्त रूपमा सो प्रमाणपत्र हस्तान्तरण गर्नुभएको थियो।
जिल्ला खोप समन्वय समितिका अध्यक्ष एवं जिल्ला समन्वय समितिका प्रमुख चिना खड्का कार्की र सदस्य सचिव झाद्वारा हस्ताक्षरित प्रमाणपत्रमा पालिकाको अथक मिहिनेतको प्रशंसा गर्दै निरन्तरताको अपेक्षा गरिएको छ। सो अवसरमा उपप्रमुख थापाले मन्थली नगरपालिकालाई बधाई दिँदै पूर्ण खोपको अवस्थालाई दिगो राख्न आग्रह गर्नुभयो। यो सँगै जिल्लाका सबै पालिकाका पूर्ण खोप सुनिश्चित पालिका घोषित भएको छ । अब केही समयमै जिल्लालाई पूर्ण खोप सुनिश्चित घोषणा गर्ने तयारी गरिएको जिल्ला समन्वय समिति रामेछापले जनाएको छ ।
