रामेछाप नगरपालिकाको रामपुर स्वास्थ्य चौकीले किशोरकिशोरीहरूको स्वास्थ्य र मनोविज्ञानलाई प्राथमिकता दिँदै विशेष सेवा सुरु गरेको छ। आवश्यक सम्पूर्ण मापदण्ड र गुणस्तर पूरा गरेपछि रामपुर स्वास्थ्य चौकीलाई औपचारिक रूपमा ‘किशोरकिशोरी मैत्री स्वास्थ्य संस्था’ घोषणा गरिएको हो। नगरभित्र यसरी विशेष मान्यता पाउने यो दोस्रो स्वास्थ्य संस्था हो, यसअघि साँघुटार स्वास्थ्य चौकीले यो सफलता पाइसकेको छ।
रामेछाप नगरपालिकाका प्रमुख लबश्री न्यौपानेले एक विशेष समारोहका बीच रामपुर स्वास्थ्य चौकीलाई नयाँ पहिचानसहित उद्घाटन गर्नुभयो। त्यस क्रममा उहाँले उमेर समूह अनुसार किशोरकिशोरीहरूमा आउने शारीरिक र मानसिक परिवर्तनलाई सही दिशा दिन तथा प्रजनन स्वास्थ्यबारे सचेत गराउन यो कदम कोसेढुङ्गा सावित हुने विश्वास व्यक्त गर्नुभयो। यस्तै, नगर प्रवक्ता समिर कार्कीले युवा वर्गमा देखिने स्वास्थ्य जोखिम कम गर्न र भविष्यका जिम्मेवार नागरिक तयार पार्न यो अभियानलाई निरन्तरता दिनुपर्नेमा जोड दिनुभयो।
अहिलेको समयमा किशोरकिशोरीहरू आफ्ना स्वास्थ्य समस्या, विशेषगरी यौन तथा प्रजनन र मानसिक तनावका कुराहरू खुलेर भन्न हिचकिचाउने गर्छन्। यही समस्यालाई मध्यनजर गर्दै स्वास्थ्य चौकीले पूर्ण गोपनीयता कायम रहने गरी परामर्श र उपचार सेवा दिने व्यवस्था मिलाएको छ। स्वास्थ्य चौकीका प्रमुख कृष्ण बहादुर तामाङले किशोरकिशोरीहरूको अधिकार र स्वास्थ्य आवश्यकतालाई बुझेर अझै परिष्कृत रूपमा सेवा प्रवाह गर्न आफूहरू प्रतिबद्ध रहेको बताउनुभयो। जनप्रतिनिधि, शिक्षक, विद्यार्थी र स्थानीय सरोकारवालाहरूको उत्साहजनक उपस्थिति रहेको उक्त घोषणा कार्यक्रमले स्थानीय स्तरमा स्वास्थ्य चेतना बढाउन नयाँ ऊर्जा थपेको छ।
