रामेछापको गोकुलगंगा गाउँपालिका–१ चुचुरेकी सशस्त्र प्रहरी सहायक हवलदार तथा राष्ट्रिय फेन्सिङ खेलाडी अनिता कार्कीले विश्वको सर्वोच्च शिखर सगरमाथाको सफल आरोहण गर्नुभएको छ । उहाँले वैशाख ४ गते सोमबार बिहान १०:२० बजे सगरमाथाको चुचुरोमा सफलतापूर्वक पाइला टेक्नुभएको हो । उहाँको यस ऐतिहासिक सफलताप्रति गोकुलगंगा गाउँपालिका परिवारले बधाई तथा शुभकामना व्यक्त गरेको छ ।
गाउँपालिकाले उहाँको यो अभूतपूर्व उपलब्धिले सम्पूर्ण गाउँपालिका, जिल्ला र सिङ्गो राष्ट्रलाई गौरवान्वित बनाएको उल्लेख गर्दै उच्च सम्मान प्रकट गरेको छ । खेलकुद र साहसिक क्षेत्रमा नेपाली महिलाको क्षमता, साहस र दृढताको उत्कृष्ट उदाहरण प्रस्तुत भएको भन्दै गाउँपालिकाले आगामी दिनमा पनि राष्ट्रको नाम विश्वभर चिनाउन सफल हुनुहोस् भनी शुभेच्छा व्यक्त गरेको छ ।
सशस्त्र प्रहरी बल, नेपालको तर्फबाट सगरमाथा आरोहण गर्ने कार्की पहिलो महिला कर्मचारी र तेस्रो सशस्त्र प्रहरी कर्मचारी बन्नुभएको छ । यसअघि चुलु फार इष्ट र लोबुचे हिमालको आरोहण गरिसक्नुभएकी कार्कीको यस अभियानमा निमा सांगे शेर्पाले सहयोगीको भूमिका निर्वाह गर्नुभएको थियो ।
