रामेछाप जिल्लाको लिखु तामाकोशी गाउँपालिकाले शैक्षिक सत्र २०८२ को माध्यमिक शिक्षा परीक्षा (एसईई) को नतिजा सार्वजनिक गरेको छ। सार्वजनिक गरिएको नतिजा अनुसार श्री झट्टेश्वर माध्यमिक विद्यालय, धोबीका छात्र अनमोल बस्नेतले ‘ए प्लस’ ग्रेडसहित पूर्ण ४.०० जीपीए प्राप्त गरी गाउँपालिकाभरिमै सर्वोत्कृष्ट स्थान हासिल गर्नुभएको छ।
गाउँ कार्यपालिकाको कार्यालयले दिएको जानकारी अनुसार, यस वर्ष गाउँपालिकाभित्रका सामुदायिक विद्यालयहरूबाट कुल २५६ जना विद्यार्थी परीक्षामा सहभागी भएका थिए। जसमध्ये १५४ जना विद्यार्थी सफल भएका छन् भने ७२ जना विद्यार्थी ‘नन-ग्रेडेड’ (एन.जी.) श्रेणीमा रहेका छन्। समग्र रूपमा गाउँपालिकाको उत्तीर्ण प्रतिशत ५८.२३ रहेको छ।
नतिजाको विश्लेषण गर्दा प्राविधिक धारतर्फको उपलब्धि निकै उत्साहजनक देखिएको छ। श्री तामाकोशी जन जागृति माध्यमिक विद्यालय, खिम्तीका ४४ जना विद्यार्थीमध्ये सबैजना उत्तीर्ण भई प्राविधिक धारले शतप्रतिशत नतिजा आत्मसात गरेको छ। सोही विद्यालयका साइमोन श्रेष्ठले ३.९२ जीपीए प्राप्त गरी प्राविधिकतर्फ उत्कृष्ट प्रदर्शन गर्नुभएको छ।
यसैगरी, श्री अरूणोदय माध्यमिक विद्यालयका आयुष मगरले ३.९० जीपीए र श्री नवदर्शन माध्यमिक विद्यालय, तिलपुङका अभिषेक पटेलले ३.५१ जीपीए प्राप्त गर्नुभएको छ। विद्यालयगत नतिजा हेर्दा नवदर्शन माविले ९३.३३ प्रतिशत र झट्टेश्वर माविले ८९.२९ प्रतिशत उत्तीर्ण दर कायम गर्न सफल भएका छन्।
