हिमाल ढुंगेल
रामेछाप २८ फागुन । एक ताका उत्पादन र विक्रि वितरण गर्न भ्याइ नभ्याई हुने गरेको रामेछापमा उत्पादित ढाका कपडाको ब्यापार अहिले आएर खस्केको छ ।
बिक्रि कम हुन थालेपछि बिगतका दिनमा पर्याप्त ढाका कपडा उत्पादन गर्ने गरेका उद्यमीहरु अहिले ढाका कपडा उत्पादन पनि कम गर्ने गरेको बताउछन् । ढाका कपडाले बजार नपाएपछि अहिले उत्पादन कम हुने गरेको उद्यमी मुना तामाङ्गले बताउनु भयो ।
रामेछापमा चर्चित लाङ्घाली ढाका कपडा उद्योग बाट ढाकाको, दौरा सुरुवाल, कोट, टोपी, सारी, चोलो, पछ्यौरा, गलबन्दी, खादा,पर्स झोला, जस्ता सामानहरु निर्माण गरेर विक्रि वितरण गर्ने गरिन्छ । तर पछिल्लो समयमा आएर यस्ता कपडा हरुको विक्रि वितरणमा कमी आएकोले आफुहरुले पर्याप्त उत्पादन गर्न नसकेको ढाका कपडा उद्यमी शर्मिला मगर बताउनुहुन्छ ।
अहिलेको पुस्ताले ढाका कपडा मन नपराउने, मल्टिनेशनल कम्पनीहरुसँग घरेलु ढाका कपडा उद्योगले प्रतिस्पर्धा गर्न नसक्ने र अहिले घरेलु उत्पादन भन्दा वाहिरबाट आयात गरिएका ढाका कपडाहरु सस्तो हुने भएकाले पनि यहाको घरेलु ढाका कपडाको उत्पादन र विक्रि घटेको उद्यमीहरु बताउँछन् । गत ८–१०वर्षको तुलनामा यस बर्ष ढाका कपडा उत्पादन र विक्रिमा निक्कै कमी आएको लाडङघाली ढाका कपडा उद्योगका सञ्चालक शेर बहादुर मगर बताउनुहुन्छ । यस उद्योगका लागि पछिल्लो समयमा कुनै पनि सरकारी निकायको सहयोग नभएको उद्यमी हरुको गुनासो छ ।
