जिल्ला प्रहरी कार्यालय रामेछापले निर्वाचनमा खटिएका निर्वाचन प्रहरी (म्यादी प्रहरी) को सेवा अवधि समाप्त भएसँगै उनीहरूलाई प्रमाणपत्र वितरण र बिदाइ गर्ने भएको छ। फागुन २१ गते सम्पन्न प्रतिनिधिसभा सदस्य निर्वाचनलाई शान्तिपूर्ण रूपमा सम्पन्न गराउन खटिएका ती प्रहरीहरूको सेवा अवधि फागुन २८ गतेदेखि समाप्त हुँदैछ।
जिल्ला प्रहरी कार्यालयले जारी गरेको सूचनाअनुसार भोलि फागुन २८ गते बिहान ११ बजे जिल्लाका विभिन्न ६ वटा स्थानमा एकैसाथ बिदाइ तथा प्रमाणपत्र वितरण कार्यक्रम आयोजना गरिनेछ। कार्यक्रम जिल्ला प्रहरी कार्यालय मन्थली, इलाका प्रहरी कार्यालयहरू धोवीडाँडा, चप्राङ, टोकरपुर, प्रीति र प्रहरी चौकी बाम्ती भण्डारमा हुने तय भएको छ।
सम्बन्धित सबै निर्वाचन प्रहरीहरूलाई आ-आफ्नो पायक पर्ने तोकिएका कार्यालयहरूमा नीलो डाङ्ग्री (डिउटी पोसाक) मा उपस्थित हुन निर्देशन दिइएको छ। “निर्वाचन प्रहरी भर्ना छनोट नियुक्ति तथा परिचालन गर्ने सम्बन्धी एकीकृत कार्यविधि-२०८२” बमोजिम नियुक्त भई तालिम प्राप्त गरेका उनीहरूलाई निर्वाचन प्रक्रियामा पुर्याएको योगदानको कदर गर्दै प्रमाणपत्रसहित सम्मानजनक बिदाइ गर्न लागिएको जिल्ला प्रहरी कार्यालय रामेछापले जनाएको छ।
