जिल्ला निर्वाचन कार्यालय रामेछापले प्रतिनिधिसभा सदस्य निर्वाचनमा भाग लिएका उम्मेदवारहरूलाई आफ्नो चुनावी खर्चको पूर्ण विवरण पेश गर्न अनुरोध गरेको छ। निर्वाचन परिणाम घोषणा भएसँगै कार्यालयले एक सूचना जारी गर्दै निर्वाचन ऐन र निर्देशिका बमोजिम तोकिएको ढाँचामा खर्च विवरण बुझाउन अनुरोध गरेको हो। निर्वाचन कार्यालय रामेछापका प्रमुख, जिल्ला निर्वाचन अधिकारी नारायण लामिछानेका अनुसार दलगत तथा स्वतन्त्र रूपमा उम्मेदवारी दिएका १७ जना उम्मेदवारले नै सवारीसाधन, इन्धन, प्रचारप्रसार सामग्री, गोष्ठी र कार्यकर्ता परिचालन लगायतका शीर्षकमा भएको यथार्थ खर्च सार्वजनिक गरी कार्यालय वा निर्वाचन आयोगमा पेश गर्नुपर्नेछ।
उम्मेदवारहरूले खर्च गर्दा प्रयोग गरेको बैंक खाताको विवरण र सो खर्च गर्ने जिम्मेवार पदाधिकारीको नाम समेत उल्लेख गरी अनुसूची बमोजिमको ढाँचामा विवरण पेश गर्नुपर्ने कानुनी व्यवस्था छ। प्रमुख लामिछानेले निर्वाचन आयोगले तोकेको समयसीमा भित्र यस्तो विवरण बुझाउन आग्रह गर्दै अटेर गर्ने वा विवरण पेश नगर्ने उम्मेदवारलाई ऐन अनुसार कारबाहीको दायरामा ल्याइने चेतावनी समेत दिनुभएको छ। फागुन २१ गते सम्पन्न निर्वाचनमा जिल्लाबाट विभिन्न राजनीतिक दल र स्वतन्त्र गरी १७ जना चुनावी प्रतिस्पर्धामा होमिएका थिए।
