मताधिकार संवैधानिक अधिकार हो । तर यो अधिकारको प्रयोग नगर्ने पनि थुप्रै छन् । प्रतिनिधि सभा सदस्यको निर्वाचनमा रामेछापमा ९७ हजार भन्दा बढी मतदाताले आफ्नो मताधिकारको उपयोग गरेका छैनन् ।
मुख्य निर्वाचन अधिकृतको कार्यालयका अनुसार जिल्लाभर कुल ९० हजार ७१० मत खसेको छ, जुन कुल मतदाता सङ्ख्याको करिब ४८ प्रतिशत मात्र हो। जिल्लामा यो निर्वाचनका लागि कुल १ लाख ८७ हजार ९५२ जना मतदाता कायम भएका थिए ।
तर ९७ हजार २४२ जना मतदाताले भने मतदानमा सहभागी नै भएनन्। अर्थात् आधाभन्दा बढी मतदाता मतदान प्रक्रियाबाट बाहिर रहे।
राजनीतिक दलप्रतिको वितृष्णा, उम्मेदवार अपेक्षा अनुसार नहुनु, विगतमा मतदान गरेपनि मतदाताको जीवनमा खासै परिवर्तन नआउनु, मतदानको दिन विदेश वा टाढा रहनु लगायतका कारणले धेरै मतदाता मतदानमा सहभागी हुन नसकेको अनुमान गरिएको छ।
निर्वाचनमा शतप्रतिशत सहभागिताका लागि योग्य उम्मेदवारको चयन, व्यापक निर्वाचन शिक्षा र आधुनिक मतदान पद्धतिको सुरुवात जरुरी रहेको सरोकारवालाहरु बताउँछन् ।