रामेछाप । प्रतिनिधिसभा सदस्य निर्वाचन अन्तर्गत रामेछाप जिल्ला मा ४८ प्रतिशत मतदान भएको छ। निर्वाचन शान्तिपूर्ण रूपमा सम्पन्न भएपछि अहिले मतपेटिका सङ्कलन र मतगणनाको तयारी तीव्र पारिएको छ।
मुख्य निर्वाचन अधिकृतको कार्यालयका अनुसार जिल्लाभर कुल ९० हजार ७१० मत खसेको छ। जसमध्ये ५० हजार ६२४ पुरुष र ४० हजार ८६ महिला मतदाताले आफ्नो मताधिकार प्रयोग गरेका छन्।
यस निर्वाचनका लागि रामेछाप जिल्ला मा कुल १ लाख ८७ हजार ९५२ जना मतदाता रहेका थिए। प्रतिनिधिसभा निर्वाचन क्षेत्र एक मात्र रहेको जिल्लामा मतदानका लागि ९६ वटा मतदान स्थल र २२८ वटा मतदान केन्द्र निर्धारण गरिएको थियो।
मतदान सकिएसँगै अहिले विभिन्न मतदान केन्द्रबाट मतपेटिका सङ्कलन गरी सदरमुकाम मन्थली ल्याउने काम भइरहेको मुख्य निर्वाचन अधिकृतको कार्यालयले जनाएको छ। सङ्कलन गरिएका मतपेटिकालाई मन्थलीस्थित मालपोत कार्यालय भवनमा राखिने र सोही स्थानबाट मतगणना प्रक्रिया सुरु गरिने तयारी गरिएको छ।
निर्वाचनलाई सुरक्षित र व्यवस्थित बनाउन सुरक्षा निकायको विशेष व्यवस्था गरिएको थियो। जिल्ला प्रशासन, सुरक्षा निकाय तथा निर्वाचन कर्मचारीको समन्वयमा मतदान शान्तिपूर्ण रूपमा सम्पन्न भएको जनाइएको छ। जिल्लाका सम्पुर्ण मतदान स्थलबाट मत पेटिका २१ गते बेलुका आइपुगेका छन् । २२ गते बिहान ९ बजे सर्वदलिय बैठक बसेपछी मत गणना गर्ने मुख्य निर्वाचन कार्यालयले जनाएको छ ।
