रामेछाप । प्रतिनिधिसभा सदस्य निर्वाचनलाई स्वच्छ, स्वतन्त्र र भयरहित वातावरणमा सम्पन्न गराउने उद्देश्यले रामेछापका ९६ वटै मतदान स्थलमा सुरक्षा सतर्कता बढाइएको छ । तीमध्ये ४१ मतदान स्थललाई अति संवेदनशील सूचीमा राखी विशेष निगरानी व्यवस्था गरिएको जिल्ला सुरक्षा समितिले जनाएको छ ।
जिल्ला सुरक्षा समितिका अनुसार ३५ मतदान स्थल संवेदनशील र २० सामान्य श्रेणीमा वर्गीकरण गरिएको छ । वर्गीकरणका आधारमा सुरक्षाकर्मी परिचालन, गस्ती, निगरानी र आवश्यक उपकरण व्यवस्थापन गरिएको छ ।
निर्वाचनको पूर्वसन्ध्यामा नेपाली सेना, नेपाल प्रहरी र सशस्त्र प्रहरी बलले संयुक्त सुरक्षा अभ्यास गर्दै मतदान अघिदेखि मतपेटिका गणनास्थलसम्म सुरक्षित ढुवानी गर्ने कार्ययोजनाको पूर्व अभ्यास सम्पन्न गरेका छन् । तीन तहको सुरक्षा घेराबाट निर्वाचनलाई शान्तिपूर्ण र विश्वसनीय बनाउने तयारी पूरा भइसकेको प्रमुख जिल्ला अधिकारी श्यामकृष्ण थापाले बताएका छन् ।
हाल जिल्लाभर मोबाइल गस्तीलाई तीव्र पारिएको छ भने मतदान स्थल वरपर अनावश्यक भीडभाड हुन नदिन कडा निगरानी राखिएको छ । जिल्ला सुरक्षा समितिका अनुसार यस निर्वाचनका लागि झन्डै १ हजार नेपाली सेना, ६ सय ८० नेपाल प्रहरी र १ हजार ४२९ जना निर्वाचन प्रहरी परिचालन गरिएको छ ।
जिल्ला निर्वाचन कार्यालयका अनुसार रामेछापमा १ लाख ८७ हजार ९५२ मतदाता रहेका छन् भने २ हजार ४२२ अस्थायी मतदाता छन् । निर्वाचनमा तीन स्वतन्त्रसहित १४ राजनीतिक दलका १७ उम्मेदवार प्रतिस्पर्धामा रहेका छन् ।
