काठमाडौँ । निर्वाचन आयोगले दुर्गम तथा भौगोलिक रूपमा विकट क्षेत्रमा रहेका मतदान केन्द्रबाट मतपेटिका संकलन गर्न हेलिकोप्टर प्रयोग गर्ने जनाएको छ । मतदान सम्पन्न भएसँगै मतगणना प्रक्रिया छिटो र व्यवस्थित बनाउन यस्तो तयारी गरिएको आयोगले स्पष्ट पारेको हो ।
कार्यवाहक प्रमुख निर्वाचन आयुक्त रामप्रसाद भण्डारीले हिमाली तथा पहाडी क्षेत्रबाट स्थलमार्गमार्फत मतपेटिका ढुवानी गर्न समय लाग्ने भएकाले आवश्यक स्थानमा हेलिकोप्टर परिचालन गरिने बताए । उनले दुर्गम क्षेत्रका मतपेटिका सुरक्षित रूपमा संकलन गरी तोकिएको समयभित्र मतगणना सुरु गर्ने लक्ष्य रहेको जानकारी दिए ।
आयोगका अनुसार प्रत्यक्षतर्फको मतगणना मतदान सम्पन्न भएको २४ घण्टाभित्रै सक्ने योजना छ । त्यसका लागि मतपेटिका संकलनलाई प्राथमिकतामा राखिएको छ । समानुपातिकतर्फको मतगणना पनि सँगसँगै अघि बढाइने आयोगको तयारी छ ।
आयोगले सुरक्षा निकायसँग समन्वय गर्दै दुर्गम क्षेत्रबाट मतपेटिका ढुवानीको व्यवस्थापन गरिरहेको जनाएको छ । छिटो र विश्वसनीय नतिजा सार्वजनिक गर्न सबै संयन्त्र परिचालन गरिएको आयोगको दाबी छ ।
