रामेछाप नगरपालिका वडा नम्बर २ सिरुवारीमा निर्वाचन सामग्री बोकेको गाडी दुर्घटनामा परेपछि रिक्त भएका मतदान केन्द्रहरूमा नयाँ कर्मचारी र सामग्री पठाएर निर्वाचनको तयारीलाई पुनः गति दिइएको छ। जिल्ला निर्वाचन कार्यालय रामेछापले दुर्घटनाका कारण प्रभावित भएका चारवटै मतदान केन्द्रमा नयाँ टोली परिचालन गरी निर्धारित समयमै निर्वाचन गराउने सुनिश्चितता गरेको हो।
जिल्ला निर्वाचन अधिकारी नारायण लामीछानेका अनुसार सिरुवाबारी र सांगुटारका मतदान केन्द्रका लागि नयाँ मतदान अधिकृत तथा सहायक मतदान अधिकृतहरू नियुक्त गरी कार्यक्षेत्रमा पठाइसकिएको छ। मुख्य निर्वाचन अधिकृतको कार्यालयसँगको समन्वयमा तत्कालै कर्मचारी व्यवस्थापन गरिएको र दुर्घटनामा परेका निर्वाचन सामग्रीहरू सुरक्षित फेला परेको कार्यालयले जनाएको छ।
सोमबार निर्वाचन सामग्री लिएर कार्यक्षेत्रतर्फ जाँदै गरेको गाडी भीरबाट करिब पाँच सय मिटर तल खस्दा दुःखद दुर्घटना भएको थियो। उक्त दुर्घटनामा परी दुई जनाको निधन भएको छ भने सात जना घाइते कर्मचारीहरूलाई हेलिकप्टरमार्फत उद्धार गरी उपचारका लागि काठमाडौँ पठाइएको छ। टोलीमा रहेका एक जना कर्मचारी भने सकुशल रहेका छन्।
दुर्घटना भए तापनि मतपत्र, मतदाता नामावली र सुरक्षा सिल लगायतका महत्वपूर्ण निर्वाचन सामग्रीहरू पूर्ण रूपमा सुरक्षित भेटिएका छन्। संकलित ती सामग्रीहरूलाई प्रहरीमार्फत जिल्ला अदालत र निर्वाचन कार्यालयको जिम्मा लगाइएको छ।
