नेपाली कांग्रेसका तर्फबाट रामेछापका प्रतिनिधि सभा सदस्य उम्मेदवार रामचन्द्र खड्काले केही दिनअघि चुनावी कोणसभामा आफू भावुक हुनुको कारण खुलाएका छन्। उक्त विषयमा जानकारी दिँदै उनले आम नागरिकमा राजनीति र नेताप्रति देखिएको चरम निराशाले आफ्नो मन दुखेको बताए।
मतदातासँगको भेटघाटमा स्थानीयले “नेता भनेका भ्रष्ट हुन्छन् र चुनावमा भोट माग्न मात्रै गाउँ आउँछन्” भन्ने कटु टिप्पणी गरेपछि आफूलाई गहिरो चोट पुगेको खड्काले बताए। स्थायी शिक्षक जस्तो सुरक्षित र मर्यादित पेसा त्यागेर समाज परिवर्तनको हुटहुटीसहित राजनीतिमा होमिएको स्मरण गर्दै उनले भने, “आफूलाई पनि अन्य स्वार्थी र अवसरवादी नेताहरूकै तराजुमा राखेर तुलना गर्दा मन सम्हाल्न सकिनँ।” आफ्नै इष्टमित्र र चिनजानका व्यक्तिहरू भएको गाउँमा समेत नेताहरूप्रति त्यस्तो चरम अविश्वास देखेपछि मन्तव्यकै क्रममा आफ्नो बोली अवरुद्ध भएको र आँसु झरेको उनले सुनाए।
सबै राजनीतिकर्मीलाई एउटै नजरले हेर्न नहुने भन्दै खड्काले राजनीतिलाई शुद्धीकरण गर्नुपर्नेमा जोड दिए। इमानदार अभ्यासबाट मात्रै नेताहरू जनताका वास्तविक सेवक हुन् भन्ने प्रमाणित गर्न सकिने उनको भनाइ छ। आगामी निर्वाचनमा आफूलाई मत दिएर जिताएमा योग्य व्यक्तिलाई विनाभेदभाव अवसर दिने र जनतामाझ आफ्नो हरेक कामको स्पष्ट तथा पारदर्शी हिसाब बुझाउने दृढ प्रतिबद्धतासमेत उम्मेदवार खड्काले व्यक्त गरेका छन्।
