जिल्ला निर्वाचन कार्यालय रामेछापले सञ्चालन गरेको मतदाता शिक्षा कार्यक्रम सम्पन्न भएको छ। फागुन ३ गतेदेखि जिल्लाका ६४ वटै वडामा घरघरमा कर्मचारी खटाई सञ्चालन गरिएको कार्यक्रम सोमबार सम्पन्न भएको हो।
कार्यालयका प्रमुख एवं जिल्ला निर्वाचन अधिकारी नारायण लामीछानेका अनुसार २०७९ सालमा सम्पन्न निर्वाचनमा रामेछाप जिल्लामा औसत ५ दशमलव ३८ प्रतिशत बदर मत परेको थियो। यस पटक भने प्रभावकारी मतदाता शिक्षाका कारण बदर मत घट्ने अपेक्षा गरिएको उहाँले बताउनुभयो।
कार्यक्रमअन्तर्गत महिला, अपाङ्गता भएका व्यक्ति, ज्येष्ठ नागरिकलगायत सबै वर्गका मतदातालाई लक्षित गरी सही मतदान प्रक्रिया, मतपत्र जाँच गर्ने तरिका, स्वस्तिक छाप प्रयोग विधि तथा बदर मत हुन नदिन अपनाउनुपर्ने सावधानीबारे जानकारी दिइएको कार्यालयले जनाएको छ।
प्रभावकारी मतदाता शिक्षामार्फत बदर मत घटाई निर्वाचनलाई थप विश्वसनीय र प्रभावकारी बनाउने लक्ष्यका साथ कार्यक्रम सञ्चालन गरिएको जनाइएको छ।
