रामेछापमा प्रतिनिधिसभा निर्वाचन नजिकिँदै जाँदा बाहिरी जिल्लामा रहेका मतदाता गाउँ फर्किन थालेका छन् । जेन्जी आन्दोलनपछि हुन लागेको यो निर्वाचनमा आफ्नो मताधिकार प्रयोग गरी सक्षम उम्मेदवार जिताउन मतदाताहरु गाउँ फर्किन थालेका हुन् ।
काठमाडौँमा काम गर्दै आएका उज्वल तामाङ मतदानका लागि नामाडी फर्किने तयारीमा छन्। उनले यसअघि जितेर गएकाले काम नगरेकै कारण जेन्जी आन्दोलन गर्नु पर्ने बताउँदै अबको निर्वाचनपछि त्यस्तो अवस्था आउन नदिन योग्य, विकासप्रेमी र जनपक्षीय उम्मेदवार छानेर भोट हाल्ने बताए।
नामाडीकै छिरिङ तामाङ पनि सचेत मतदाताको रूपमा मतदान गर्न गाउँ आउँदै छन्। उनको माग रोजगारीका लागि सहर वा विदेश जानुपर्ने अवस्था अन्त्य हुनुपर्ने छ ।
काठमाडौँमै काम गर्ने रमण श्रेष्ठ पनि गाउँ फर्किने तयारीमा छन्। अघिल्ला नेताबाट अपेक्षित परिवर्तन नआए पनि मतदान आफ्नो अधिकार र अवसर भएकाले सहभागी हुन लागेको उनले बताए। उनको पनि युवालाई गाउँमै रोजगारी र शिक्षा उपलब्ध गराउनुपर्ने माग छ।
उनीहरु जस्तै धेरै जना अहिले मतदानका लागि गाउँ फर्किने तयारीमा छन्। तर यातायातको सुविधा सहजै प्राप्त गर्न गाह्रो भएको गुनासो पनि छ । कतिपय राजनीतिक दलहरूले गाडीको व्यवस्था समेत गरेका छन् । तर ठूलो संख्यामा मतदाता बाहिर रहेकाले सबैलाई उक्त व्यवस्था असम्भव देखिएको सरोकारवाला बताउछन् ।
मतदाताहरु गाउँ फर्किन थालेसँगै जिल्लाका नाकामा सुरक्षा कडा बनाउन थालिएको छ । प्रमुख जिल्ला अधिकारी श्यामकृष्ण थापाले मतदाता गाउँ फर्किने क्रम बढेको र सवारी साधनमा निगरानी कडाइ गरिएको जानकारी दिए।