लिखु तामाकोशी गाउँपालिकाले गत माघ २७ गते रामेछापको मन्थलीमा भएको भयानक बस दुर्घटनाप्रति संघीय सरकार संवेदनशील नभएको भन्दै गम्भीर ध्यानाकर्षण गराएको छ।
गाउँपालिकाले प्रमुख जिल्ला अधिकारीमार्फत गृह मन्त्रालयलाई एक ध्यानाकर्षण पत्र बुझाउँदै मृतकका परिवारलाई क्षतिपूर्ति र घटनाको निष्पक्ष छानबिनको माग गरेको हो।गाउँपालिकाका अध्यक्ष केशव महत र उपाध्यक्ष दिपा पाख्रिनद्वारा हस्ताक्षरित पत्रमा हालै फागुन ११ गते धादिङको बेनीघाट रोराङमा भएको बस दुर्घटना (१९ जनाको मृत्यु) पछि गृहमन्त्रीको अध्यक्षतामा छानबिन समिति गठन गरिएकोमा सरकारलाई धन्यवाद दिइएको छ। तर, सोही प्रकृतिको रामेछाप दुर्घटनामा भने सरकारले पूर्ण रुपमा बेवास्ता गरेको भन्दै असन्तुष्टि व्यक्त गरिएको छ।गत माघ २७ गते काठमाडौंबाट खुर्कोट-मन्थली हुँदै ओखलढुंगातर्फ जाँदै गरेको पूर्व अरनिको यातायात प्रा.लि. को बा.प्र ०१-०५ ख ९९७५ नम्बरको बस मन्थली नगरपालिका-६ बेनीघाट पुल नजिकै तामाकोशी नदीमा खस्दा दुर्घटना भएको थियो। उक्त दुर्घटनामा परी १२ जनाको घटनास्थलमै र थप ३ जनाको शव पछि फेला परेको गरी कुल १५ जनाको मृत्यु भएको थियो भने ८ जना घाइते भएका थिए।
दुर्घटनाको भोलिपल्टै माघ २८ गते जिल्ला सुरक्षा समिति, राजनीतिक दल, जनप्रतिनिधि, पत्रकार र नागरिक समाजसहितको बैठकले प्रधानमन्त्री कार्यालय र गृह मन्त्रालयलाई घटनाबारे आधिकारिक जानकारी गराएको थियो। तर, हालसम्म पनि सरकारले उक्त घटनालाई लिएर कुनै छानबिन समिति नबनाएको र क्षतिपूर्तिको पहल नगरेकोप्रति गाउँपालिकाले आपत्ति जनाएको छ।
उक्त घटनापछि नेपाल सरकार संवेदनशील नभएको विषयप्रति यस लिखु तामाकोशी गाउँपालिका गम्भीर ध्यानाकर्षण गराउँदछ,” पत्रमा भनिएको छ। गाउँपालिकाले घटनाको निष्पक्ष छानबिन गरी मृतक तथा घाइते परिवारलाई उचित क्षतिपूर्तिको व्यवस्था गर्न नेपाल सरकारसँग जोडदार माग गरेको छ।यसैगरी, दुर्घटनापछि यस क्षेत्रमा पूर्व अरनिको यातायातको सेवा बन्द हुँदा नागरिकलाई यातायातमा असहज परिस्थिति सिर्जना भएको गाउँपालिकाले जनाएको छ। यातायात सेवालाई थप व्यवस्थित र सुरक्षित बनाई सुचारु गर्न सरकार एवं सम्बन्धित सबै पक्षलाई सकारात्मक भूमिका निर्वाह गर्न समेत गाउँपालिकाले आग्रह गरेको छ।
