रामेछाप । आउँदो २१ फागुनमा हुने प्रतिनिधिसभा सदस्य निर्वाचनलाई लक्षित गर्दै रामेछापमा सुरक्षा व्यवस्था कडा पारिएको छ । प्रहरी प्रशासनले स्थानीय तहसँग समन्वय गर्दै मतदान केन्द्रको सुरक्षालाई थप प्रभावकारी र पारदर्शी बनाउन आधुनिक प्रविधिको प्रयोग सुरु गरेको जनाएको छ ।
जिल्ला प्रहरी कार्यालय रामेछापका प्रहरी प्रमुख (डिएसपी) भोलाकुमार भट्टका अनुसार जिल्लाका विभिन्न संवेदनशील र अति संवेदनशील मतदान स्थलहरूमा सिसिटिभी क्यामेरा जडान गरिएको हो । उनका अनुसार आठवटै स्थानीय तहसँग समन्वय गरी हालसम्म ३१ वटा मतदान स्थलमा सिसिटिभी जडान गरिएको छ भने केही स्थानमा जडान गर्ने काम जारी छ ।
उनले स्थानीय तहसँग सहकार्य गर्दै जहाँ सिसिटिभी नभएका स्थलहरूमा जडान गर्न र भएका स्थानमा थप व्यवस्थित गर्न पहल गरिएको बताए । सुनापति गाउँपालिकाका सबै मतदान स्थलमा सिसिटिभी जडान गर्ने काम तीव्र रूपमा भइरहेको उनले जानकारी दिए ।
रामेछाप, मन्थली नगरपालिकासहित उमाकुण्ड, गोकुलगंगा, लिखु तामाकोशी, खाँडादेवी, सुनापति र दोरम्बा शैलुङ गाउँपालिकाका विभिन्न मतदान स्थलमा सिसिटिभी जडान गरिएको प्रहरीले जनाएको छ ।
जिल्लामा कुल १ लाख ८७ हजार ९५२ मतदाता रहेका छन् । जसमा ९१ हजार ६० महिला र ९६ हजार ८ सय ९२ पुरुष मतदाता रहेका छन् । जिल्लाभर ९६ वटा मतदान स्थल र २२८ वटा मतदान केन्द्र तोकिएका छन् ।
यसपटकको निर्वाचनमा २०७९ सालको निर्वाचनको तुलनामा उमाकुण्ड गाउँपालिका–५ प्रीतिको सरस्वती माध्यमिक विद्यालय सुनुवारधारा र मन्थली नगरपालिका–११ गेलुको मनकामना माध्यमिक विद्यालयमा दुई वटा मतदान केन्द्र थप गरिएको छ ।
निर्वाचन आयोगको कार्यालय रामेछापका अनुसार अघिल्लो निर्वाचनको तुलनामा दोरम्बा शैलुङ गाउँपालिका–५ र ७ का केही मतदान केन्द्र भने हटाइएको छ । विद्यालय तथा वडा कार्यालयहरूमा पहिले नै जडान भएका सिसिटिभी क्यामेरालाई समेत प्रयोग गर्ने तयारी गरिएको जनाइएको छ ।
सुरक्षा निकायका अनुसार जिल्लाका एक दर्जनभन्दा बढी मतदान केन्द्र तथा स्थललाई अति संवेदनशीलको रूपमा पहिचान गरी सोहीअनुसार सुरक्षा योजना तयार गरिएको छ ।
प्रहरी प्रमुख भट्टका अनुसार मंगलबारसम्म करिब ८० प्रतिशत मतदान स्थल र केन्द्रमा सुरक्षाकर्मीको टोली पुगिसकेको छ । आवश्यक परेमा कुनै पनि स्थानमा १० मिनेटभित्र अतिरिक्त सुरक्षा फोर्स पुग्ने गरी सुरक्षा रणनीति बनाइएको उनले बताए ।
उता, निर्वाचन आयोगको कार्यालयले सोमबार साँझसम्म मतदान अधिकृत र सहायक मतदान अधिकृतसहित १ हजार ३७४ जना कर्मचारी खटाइसकेको जनाएको छ । उनीहरूलाई मंगलबार एक दिने अभिमुखीकरण कार्यक्रममार्फत निर्वाचन व्यवस्थापनबारे प्रशिक्षण दिइएको छ ।
